റെയിൽവേസ്റ്റേഷന് ശ്രീകൃഷ്ണന്‍റെ പേര് നൽകാൻ കേന്ദ്രാനുമതി

റാഞ്ചി: ജാർഖണ്ഡിലെ റെയിൽവേ സ്റ്റേഷന് ശ്രീകൃഷ്ണന്റെ പേര് വേണമെന്ന സംസ്ഥാന സർക്കാരിന്റെ ആവശ്യത്തിന് കേന്ദ്രാനുമതി. ഗർവാ ജില്ലയിലെ നഗർ അന്തേരി റെയിൽവേ സ്റ്റേഷന്റെ പേരാണ് സർക്കാർ മാറ്റുന്നത്. റെയിൽവേ സ്റ്റേഷന് ബന്‍സിധാര്‍ എന്നാണ് പുതുതായി നൽകുന്ന പേര്. റെയിൽവേസ്റ്റേഷനുകൾ, റോഡുകൾ, നഗരങ്ങൾ എന്നിവയുടെ പേര് മാറ്റണമെങ്കിൽ സംസ്ഥാനസർക്കാർ കേന്ദ്രത്തിൽ നിന്ന് എൻഒസി വാങ്ങണം.

പുതിയ റെയിൽവേ പദ്ധതിയുടെ ആദ്യ പടിയാണ് പേരു മാറ്റം. നഗർ അന്ധേരി ടൗണിനെയും റെയിൽവേ സ്റ്റേഷനെയും ബന്‍സിധാര്‍ ക്ഷേത്രവുമായി ബന്ധിപ്പിക്കുന്നതാണ് പദ്ധതി. ഇന്റർനാഷണൽ സൊസൈറ്റി ഫോർ കൃഷ്ണാ കോൺഷ്യസ്‌‍നെസു(ഇസ്‌കോണ്‍)മായി ക്ഷേത്രത്തെ ബന്ധിപ്പിക്കാനും പദ്ധതിയുള്ളതായി മുഖ്യമന്ത്രി രഘുബർ ദാസ് പറഞ്ഞു. ഉത്തർപ്രദേശിലെ മഥുരയും വൃന്ദാവനും പോലെ ബന്‍സിധാറിലും വികസനം കൊണ്ടുവരികയാണ് ലക്ഷ്യമെന്ന് മന്ത്രി വ്യക്തമാക്കി.