ജൂൺ മുതൽ രാജ്യത്ത് എല്ലാ മരുന്നുകള്‍ക്കും വില നിയന്ത്രണം

ന്യൂഡൽഹി: രാജ്യത്ത് 850 അവശ്യമരുന്നുകള്‍ക്ക് ഏര്‍പ്പെടുത്തിയ വിലനിയന്ത്രണം എല്ലാ മരുന്നുകളിലേയ്ക്കും വ്യാപിപ്പിക്കാനൊരുങ്ങി കേന്ദ്രസര്‍ക്കാര്‍. ഇതിനായി നിലവിലുള്ള മരുന്നുവില നിയന്ത്രണ ചട്ടങ്ങളിൽ ഭേദഗതികള്‍ വരുത്താൻ ശ്രമം തുടങ്ങി. ജൂൺ അവസാനത്തോടെ പുതിയ സംവിധാനം അവതരിപ്പിക്കാനാണ് ശ്രമം.

നിലവിൽ ദേശീയ മരുന്നുവില നിയന്ത്രണ അതോരിറ്റിയുടെ പട്ടികയിലില്ലാത്ത മരുന്നുകള്‍ക്ക് വര്‍ഷം തോറും 10 ശതമാനം വില വര്‍ധിപ്പിക്കാൻ കമ്പനികള്‍ക്ക് അനുവാദമുണ്ട്. എന്നാൽ പുതിയ നിയന്ത്രണം വരമ്പോള്‍ ഇവയെല്ലാം ഉള്‍പ്പെടുത്തി പുതിയ വിലനിയന്ത്രണ പട്ടിക കേന്ദ്രസര്‍ക്കാര്‍ പുറത്തിറക്കും. കേന്ദ്രസര്‍ക്കാര്‍ പുറത്തിറക്കുന്ന സൂചികയുടെ അടിസ്ഥാനത്തിൽ മാത്രമേ ഇവയുടെ വില വര്‍ധിപ്പിക്കാനാകൂ.

പുതിയ നീക്കത്തിനെതിരെ മരുന്നുകമ്പനികള്‍ രംഗത്തെത്തിയേക്കുമെന്നാണ് കരുതപ്പെടുന്നത്. നിലവിൽ കേന്ദ്ര ഫാര്‍മസ്യൂട്ടിക്കൽ വകുപ്പിന്‍റെ ശുപാര്‍ശ ആരോഗ്യമന്ത്രാലയത്തിന്‍റെ പരിഗണനയിലാണ്. മരുന്നുകളുടെ മൊത്തവിൽപന വിലയുടെ അടിസ്ഥാനത്തിലാണ് വിലനിയന്ത്രണം. നീതി ആയോഗിന്‍റെ നിര്‍ദേശപ്രകാരമാണ് പുതിയ തീരുമാനം.