പ്രതിമകൾ തകർത്ത സംഭവം അന്വേഷിക്കാൻ പ്രത്യേക സമിതി

ന്യൂഡൽഹി: രാജ്യത്തിൻെറ വിവിധ ഭാഗങ്ങളിൽ പ്രതിമകൾ തകർക്കപ്പെട്ട സംഭവത്തെ കുറിച്ച് അന്വേഷിക്കാൻ പ്രത്യേക സമിതിയെ നിയോഗിച്ചു. രാവിലെ സംഭവത്തെ പ്രധാനമന്ത്രി നരേന്ദ്രമോദി അപലപിച്ചിരുന്നു. നിയമസഭാ തെരഞ്ഞെടുപ്പിന് ശേഷം ത്രിപുരയിൽ ലെനിൻെറ പ്രതിമ തകർത്തിരുന്നു. തമിഴ്നാട്ടിലെ വെല്ലൂരിൽ പെരിയാറിൻെറ പ്രതിമയും തകർത്തു. ബംഗാളിൽ ജനസംഘം സ്ഥാപക നേതാവ് ശ്യാമപ്രസാദ് മുഖർജിയുടെ പ്രതിമയും തകർക്കപ്പെട്ടിട്ടുണ്ട്.

സംഭവങ്ങളിൽ അന്വേഷണം നടത്തി നടപടിയെടുക്കണമെന്ന് അദ്ദേഹം ആഭ്യന്തരമന്ത്രി രാജ് നാഥ് സിങിന് നിർദ്ദേശം നൽകിയിട്ടുമുണ്ട്. ഇതേ തുടർന്നാണ് അന്വേഷണത്തിന് പ്രത്യേക സമിതിയെ നിയോഗിച്ചിരിക്കുന്നത്. ഇത്തരം വിധ്വംസക പ്രവർത്തനങ്ങളിൽ ഉള്‍പ്പെട്ടിട്ടുള്ളവർ പിടിക്കപ്പെട്ടാൽ നിയമത്തിന്‍റെ എല്ലാ സാധുതയും ഉപയോഗപ്പെടുത്തി ശിക്ഷിക്കാനാണ് തീരുമാനം.

ജില്ലാ മജിസ്ട്രേറ്റുമാർ, പോലീസിലെ സീനിയർ സൂപ്രണ്ടുമാർ എന്നിവരുള്‍പ്പെട്ട സമിതിയാണ് അന്വേഷണത്തിനുള്ളത്. ഓരോ സംസ്ഥാനത്തും ഇത്തരം പ്രവർത്തനങ്ങൾ വിലയിരുത്താൻ നിർദ്ദേശവുമുണ്ട്.