മുത്തലാഖ്: ബിജെപി രാഷ്ട്രീയം കളിക്കുന്നുവെന്ന് കോണ്‍ഗ്രസ്

ന്യൂഡല്‍ഹി: മുത്തലാഖ് വിഷയത്തില്‍ കേന്ദ്രസര്‍ക്കാരും ബിജെപിയും രാഷ്ട്രീയം കളിക്കുകയാണെന്ന് കോണ്‍ഗ്രസ്. വിഷയത്തെ ബിജെപി രാഷ്ട്രീയ ആയുധമാക്കുകയാണ്. കോണ്‍ഗ്രസ് വക്താവ് രണ്‍ദീപ് സുര്‍ജെവാലയാണ് കേന്ദ്രസര്‍ക്കാരിനെയും ബിജെപിയെയും വിമര്‍ശിച്ച് രംഗത്തെത്തിയത്.

മുത്തലാഖിന് വിധേയരാകുന്ന സ്ത്രീകള്‍ക്ക് നഷ്ടപരിഹാരം നല്‍കണമെന്നും അല്ലാത്തപക്ഷം ഭര്‍ത്താവിന്‍റെ സ്വത്തുവകകള്‍ കണ്ടുകെട്ടണമെന്നുള്ള സുപ്രധാന നിര്‍ദ്ദേശം കോണ്‍ഗ്രസ് മുന്നോട്ടുവെച്ചിരുന്നു. എന്നാല്‍ ഇവ അംഗീകരിക്കാന്‍ കേന്ദ്രസര്‍ക്കാര്‍ തയ്യാറായില്ലെന്നും രണ്‍ദീപ് സുര്‍ജെവാല കുറ്റപ്പെടുത്തി.

മുസ്ലീം സ്ത്രീകള്‍ക്ക് നീതി ലഭിക്കുക എന്നതല്ല മോദി സര്‍ക്കാരിന്‍റെ ലക്ഷ്യമെന്ന് ഇതില്‍ നിന്നുതന്ന വ്യക്തമാകുമെന്ന് അദ്ദേഹം ചൂണ്ടിക്കാട്ടി. അതേസമയം കോണ്‍ഗ്രസ് ഇതിനെ മനുഷ്യത്വപരമായാണ് സമീപിക്കുന്നതെന്നും സുര്‍ജേവാല വ്യക്തമാക്കി. മുത്തലാഖ് ക്രിമിനല്‍ കുറ്റമാക്കിക്കൊണ്ടുള്ള കേന്ദ്രസര്‍ക്കാര്‍ ഓര്‍ഡിനന്‍സ് പുറത്തിറക്കിയതിന് പിന്നാലെയാണ് കോണ്‍ഗ്രസിന്‍റെ പ്രതികരണം.