ആന്ധ്രയിൽ ഇനി സിബിഐക്ക് വിലക്ക്

ആന്ധ്രയിൽ സിബിഐ അന്വേഷണത്തിന് വിലക്കേർപ്പെടുത്തി ചന്ദ്രബാബു നായിഡു സർക്കാർ. അഴിമതി കേസുകൾ ഇനി സംസ്ഥാന സർക്കാരിനു കീഴിലുള്ള അഴിമതി വിരുദ്ധ ബ്യൂറോയാണ് അന്വേഷിക്കുക. ആന്ധ്രയിൽ ഇനി റെയ്ഡുകൾ നടത്തണമെങ്കിൽ സംസ്ഥാന സർക്കാരിന്റെ അനുമതി ആവശ്യമാണ്. കേന്ദ്ര അന്വേഷണ ഏജൻസിയുടെ പ്രവർത്തനം ഇത് ആദ്യമായാണ് ഒരു സംസ്ഥാന സർക്കാർ വിലക്കുന്നത്.

സിബിഐയുടെ വിശ്വാസ്യത നഷ്ടമായെന്നാണ് ചന്ദ്രബാബു നായിഡു സർക്കാരിന്റെ വാദം. കേന്ദ്രസർക്കാർ സിബിഐയെ രാഷ്ട്രീയ താത്പര്യങ്ങൾക്കുവേണ്ടി ഉപയോഗിക്കുകയാണ്. അഴിമതി കേസുകളിൽ ടിഡിപി നേതാക്കൾ അന്വേഷണം നേരിടുന്ന സാഹചര്യത്തിലാണ് വിലക്ക് എന്നതും ശ്രദ്ധേയമാണ്.

ചന്ദ്രബാബു സർക്കാർ ബിജെപിയുമായുള്ള കൂട്ടുകെട്ട് അവസാനിപ്പിച്ചതോടെ സിബിഐ ടിഡിപി നേതാക്കൾക്കെതിരെയുള്ള അന്വേഷണം കനപ്പിച്ചിരുന്നു. അതേസമയം ആന്ധ്രസർക്കാരിന്റെ നടപടിയോട് കേന്ദ്രസർക്കാർ പ്രതികരിച്ചിട്ടില്ല.