കനത്ത സുരക്ഷയിൽ ഛത്തീസ്ഗഡ് ആദ്യഘട്ട വോട്ടെടുപ്പ് തുടങ്ങി

റായ്‍‍പൂര്‍: അഞ്ച് സംസ്ഥാനങ്ങളിൽ നടക്കുന്ന നിയമസഭാ തെരഞ്ഞെടുപ്പിന്‍റെ ആദ്യഘട്ടത്തിന് ഇന്ന് തുടക്കം. ഛത്തീസ്‍‍ഗഡിലെ ആദ്യഘട്ട വോട്ടെടുപ്പ് ആരംഭിച്ചു. മാവോയിസ്റ്റ് ഭീഷണി നിലനിൽക്കുന്ന പതിനെട്ട് മണ്ഡലങ്ങളിലേയ്ക്കുള്ള വോട്ടെടുപ്പാണ് ആരംഭിച്ചത്. ഡ്രോണുകളും ഹെലികോപ്റ്ററുകളുമുള്‍പ്പെടെ കര്‍ശനസുരക്ഷാസംവിധാനങ്ങളാണ് പ്രദേശത്ത് ഒരുക്കിയിരിക്കുന്നത്.

മുൻ പ്രധാനമന്ത്രി എ ബി വാജ്പേയുടെ സഹോദരപുത്രിയായ കരുണ ശുക്ലയും മുഖ്യമന്ത്രി രമൺ സിങും ഏറ്റുമുട്ടുന്ന രാജ്‍‍നന്ദൻഗാവ് ആണ് ഈ ഘട്ടത്തിലെ ശ്രദ്ധേയമായ മണ്ഡലം. കോൺഗ്രസ് സ്ഥാനാര്‍ഥിയായ കരുണ ശുക്ല മുൻപ് ബിജെപിയിലായിരുന്നു.

സിപിഐയ്ക്ക് സ്വാധീനമുള്ള ദന്തേവാഡയിലും ഇന്ന് തെരഞ്ഞെടുപ്പ് നടക്കും. മന്ത്രിയായ മഹേഷ് ഗഗ്ഡ ബിജാപൂരിലും കേദര്‍ കശ്യപ് നാരായൺപൂരിലും ജനവിധി തേടുന്നുണ്ട്.

എട്ട് ജില്ലകളിലായി 4336 പോളിങ് ബൂത്തുകളാണ് ഒരുക്കിയിരിക്കുന്നത്. 190 സ്ഥാനാര്‍ഥികളാണ് മൊത്തം മത്സരിക്കുന്നത്. കേരളത്തെക്കാള്‍ വലുപ്പം വരുന്ന ഭൂപ്രദേശത്ത് 32 ലക്ഷത്തോളം വോട്ടര്‍മാര്‍ ഈ ഘട്ടത്തിൽ വോട്ടുകുത്തും.