വീട്ടിലിരുന്ന് മടുത്തതിനാല്‍ യാത്ര ചെയ്യാന്‍ തീരുമാനിച്ചു; ലോക്ക്ഡൗണ്‍ ലംഘിച്ച് ഛത്തീസ്ഗഢ് മന്ത്രി

റായ്പൂര്‍: ലോക്ക്ഡൗണ്‍ ലംഘിച്ച് 250 കിലോമീറ്റര്‍ യാത്ര ചെയ്ത് ഛത്തീസ്ഗഢ് എക്‌സൈസ് മന്ത്രി കവാസി ലഖ്മ. യാത്ര ചെയ്തതിനു മന്ത്രി നല്‍കിയ മറുപടിയാണ് രസകരം. വീട്ടിലിരുന്ന് മടുത്തത് കൊണ്ട് യാത്ര ചെയ്തതെന്നാണ് അദ്ദേഹത്തിന്റെ ന്യായീകരണം.

Also Read: COVID-19 Live: മുംബൈയില്‍ കൂടുതല്‍ മാധ്യമപ്രവര്‍ത്തകര്‍ക്ക് കൊവിഡ്

റായ്ഗണ്ഡിലെ ഒരു സന്യാസിയെ കാണാനാണ് ലഖ്മ പോയത്. 'റായ്പൂരിലെ വീട്ടിലിരുന്ന് എനിക്ക് മടുത്തു. അതുകൊണ്ട് റായ്ഗണ്ഡിലെത്തി മഹാത്മജിയെ കണ്ടു', ലഖ്മ മാധ്യമപ്രവര്‍ത്തകരോട് പറഞ്ഞു. ജനങ്ങളുടെ ജീവന്‍ സംരക്ഷിക്കുക എന്നതാണ് സംസ്ഥാന സര്‍ക്കാരിന്റെ മുഖ്യ ലക്ഷ്യമെന്ന് ലഖ്മ കൂട്ടിച്ചേര്‍ത്തു.

Also Read: യൂറോപ്പില്‍ മരണസംഖ്യ ഒരു ലക്ഷം കടന്നു; 20,000 പിന്നിട്ട് സ്‌പെയിന്‍, അമേരിക്കയില്‍ ഒറ്റദിവസം മരണം 1,800

'ആവശ്യമായ എല്ലാ മുന്‍കരുതലുകളും എടുത്തിട്ടുണ്ട്. ജനങ്ങളുടെ ജീവന്‍ രക്ഷിക്കുക എന്നതാണ് പ്രധാനം. ലോക്ക്ഡൗണ്‍ നീക്കാന്‍ ജില്ലകള്‍ അഭ്യര്‍ഥിച്ചാല്‍ അത് നടപ്പിലാകും. സംസ്ഥാനം കൊറോണ വൈറസിന്റെ പിടിയിലാണ്. ഡോക്ടര്‍മാരും അധികൃതരും സാധാരണക്കാരും ഉള്‍പ്പെടെ കൊറോണയ്‌ക്കെതിരെയുള്ള പോരാട്ടത്തിലാണ്', ലഖ്മ പറഞ്ഞു. മെയ് മൂന്ന് വരെ രാജ്യത്ത് ലോക്ക്ഡൗണ്‍ നീട്ടിയിരിക്കുകയാണ്. രാജ്യത്ത് ലോക്ക്ഡൗണ്‍ നിര്‍ദേശങ്ങള്‍ കര്‍ശനമാക്കിയ സാഹചര്യത്തിലാണ് മന്ത്രിയുടെ യാത്ര.