പി ചിദംബരം കളളപ്പണത്തിന്‍റെ സുഹൃത്തും പിതാവുമെന്ന് ബിജെപി

ദില്ലി: മുന്‍ ധനമന്തി പി ചിദംബരത്തിനെതിരെ ആഞ്ഞടിച്ച് ബിജെപി. പാര്‍ട്ടി ദേശീയ വക്താവ് സമ്പിത് പത്രയാണ് ചിദംബരത്തിനെതിരെ രൂക്ഷമായി വിമര്‍ശനവുമായി രംഗത്തെത്തിയിരിക്കുന്നത്. യുപിഎ സര്‍ക്കാരില്‍ ധനമന്ത്രിയായിരുന്ന ചിദംബരം കള്ളപ്പണത്തിന്‍റെ സുഹൃത്തും പിതാവും അതോടൊപ്പം തത്വജ്ഞാനിയുമാണെന്നാണ് സമ്പിത് പത്ര വിശേഷിപ്പിച്ചത്.

വിജയ് മല്യ നടത്തിയ വിവാദ വെളിപ്പെടുത്തലിന് ശേഷമാണ് ബിജെപിയുടെ വിമര്‍ശനം. മല്യയുടെ വെളിപ്പെടുത്തലിനു ശേഷം ദേശീയ രാഷ്ട്രീയത്തില്‍ കോണ്‍ഗ്രസ്-ബിജെപി പോര് മുറുകുകയാണ്.
രാജ്യത്ത് നിന്ന് കടക്കുന്നതിന് മുമ്പ് താന്‍ അരുണ്‍ ജയ്റ്റ്‍ലിയെ കണ്ടുവെന്ന് വിജയ് മല്യ തന്നെ വെളിപ്പെടുത്തിയ പശ്ചാത്തലത്തില്‍ ധനമന്ത്രി രാജിവെയ്ക്കണമെന്ന ആവശ്യമാണ് കോണ്‍ഗ്രസും രാഹുല്‍ ഗാന്ധിയും ഉന്നയിക്കുന്നത്.

എന്നാല്‍, ഗാന്ധി കുടുംബം കിംഗ്ഫിഷര്‍ ഗ്രൂപ്പിന് വഴിവിട്ട സഹായങ്ങള്‍ നല്‍കിയെന്ന ആരോപണം ബിജെപിയും ഉയര്‍ത്തിയിട്ടുണ്ട്. കിംഗ് ഫിഷര്‍ എയര്‍ലെെന്‍സില്‍ ഗാന്ധി കുടുംബത്തിന് ബിസിനസ് ക്ലാസില്‍ സൗജന്യ യാത്രയായിരുന്നുവെന്ന് ബിജെപി ആരോപിച്ചു.