സുപ്രീംകോടതി ചീഫ് ജസ്റ്റിസ് ദീപക് മിശ്ര ഇന്ന് വിരമിക്കും

ന്യൂഡല്‍ഹി: സുപ്രീംകോടതി ചീഫ് ജസ്റ്റിസ് ദീപക് മിശ്ര ഇന്ന് വിരമിക്കും. ഔദ്യോഗിക വിരമിക്കല്‍ തീയതി നാളെയാണെങ്കിലും ഒക്ടോബര്‍ രണ്ടിന് ഗാന്ധിജയന്തി അവധിയായതിനാല്‍ ഇന്നായിരിക്കും ദീപക് മിശ്രയുടെ സുപ്രീംകോടതിയിലെ അവസാന പ്രവര്‍ത്തി ദിനം.

കഴിഞ്ഞ ഓഗസ്റ്റിലാണ് മിശ്ര ചീഫ് ജസ്റ്റിസ് ആയി ചുമതലയേറ്റത്. ജസ്റ്റിസ് ജെ.എസ്ർ ഖെഖറില്‍ നിന്നായിരുന്നു അധികാരം ദീപക് മിശ്രയിലെത്തിയത്. രാജ്യത്തെ 45-ാം ചീഫ് ജസ്റ്റിസ് ആയി 14 മാസത്തെ സേവനം കഴിഞ്ഞാണ് ദീപക് മിശ്ര ഔദ്യോഗിക ജീവിതം അവസാനിപ്പിക്കുന്നത്.

ശബരിമല സ്ത്രീപ്രവേശനം ഉള്‍പ്പെടെ നിര്‍ണായക വിധികള്‍ പ്രഖ്യാപിച്ചശേഷമാണ് അദ്ദേഹം പടിയിറങ്ങുന്നത്. ആധാര്‍ കേസ്, വിവാഹേതര ലൈംഗിക ബന്ധം ക്രിമിനല്‍ കുറ്റമല്ലാതാക്കുന്ന വിധി, സ്വവര്‍ഗ ലൈംഗികത നിയമവിധേയമാക്കിയ വിധി എന്നിവയും അദ്ദേഹത്തിന്‍റെ കൈയ്യൊപ്പ് പതിഞ്ഞവയാണ്.

സുപ്രീംകോടതിയുടെ ചരിത്രത്തില്‍ ആദ്യമായി മുതിര്‍ന്ന ജസ്റ്റിസുമാരുടെ കലാപത്തിനും ദീപക് മിശ്ര സാക്ഷിയായിരുന്നു. മിശ്രയുടെ പക്ഷപാതിത്വപരമായ സമീപനങ്ങള്‍ക്ക് എതിരെ ജസ്റ്റിസ് ചെലമേശ്വര്‍ ഉള്‍പ്പെടെയുള്ളവര്‍ രംഗത്ത് എത്തിയിരുന്നു. ചീഫ് ജസ്റ്റിസ് സ്ഥാനത്ത് നിന്ന് മിശ്രയെ നീക്കാന്‍ ഇംപീച്ച്മെന്‍റ് നടപടികള്‍ വരെ പ്രതിപക്ഷത്തിന്‍റെ ഭാഗത്ത് നിന്നുണ്ടായിരുന്നു എന്നത് ഒരുപക്ഷേ, അദ്ദേഹത്തിന്‍റെ ഔദ്യോഗിക ജീവിതത്തിലെ കളങ്കമായി അവശേഷിച്ചേക്കാം.

ജസ്റ്റിസ് രഞ്ജന്‍ ഗൊഗോയ്‍ ആണ് ഇന്ത്യയുടെ അടുത്ത ചീഫ് ജസ്റ്റിസ്. രാഷ്ട്രപതി ഭവനില്‍വച്ച് നടക്കുന്ന ചടങ്ങില്‍ അദ്ദേഹം സത്യപ്രതിജ്ഞ ചെയ്യും.