ഇന്ത്യൻ അതിർത്തി ചൈന കൈയേറിയെന്ന് വിദേശകാര്യമന്ത്രാലയം

ന്യൂഡൽഹി: ചൈനീസ് സൈന്യം ഇന്ത്യൻ അതിർത്തി പ്രദേശങ്ങളിൽ കടന്നു കയറി റോഡ് നിർമിക്കാൻ ശ്രമം നടത്തിയെന്ന് വിദേശകാര്യ മന്ത്രാലയം. ദോക് ലാം മേഖലയിലാണ് റോഡ് നിര്‍മിക്കാന്‍ ശ്രമം നടന്നത്. 2012ലെ ഇരുരാജ്യങ്ങളും തമ്മിലുള്ള ധാരണക്ക് വിരുധമാണ് ചൈനയുടെ നടപടി. സുരക്ഷ ശക്തമാക്കുമെന്ന് വിദേശകാര്യ മന്ത്രാലയം വ്യക്തമാക്കി.

റോയൽ ഭൂട്ടാൻ ആർമി നടത്തിയ പെട്രോളിങ്ങിനിടെയാണ് ജൂൺ 16ന് ഇന്ത്യയുടെ നിയന്ത്രണത്തിലുള്ള പ്രദേശത്ത് കടന്നുകയറി ചൈനീസ് ലിബറേഷൻ ആർമി റോഡ് നിർമിക്കാൻ ശ്രമിക്കുന്നതായി കണ്ടെത്തിയതെന്ന് വിദേശകാര്യ മന്ത്രാലയം വാർത്താകുറിപ്പിൽ വ്യക്തമാക്കി.

അതിനിടെ ചൈനക്ക് അരുണ്‍ ജെയ്‍റ്റ്‍ലി മുന്നറിയിപ്പ് നല്‍കുകയും ചെയ്തു. 1962ലെ യുദ്ധ സാഹചര്യത്തിൽ നിന്ന് ഏറെ വ്യത്യസ്തമാണ് 2017ലെ സാഹചര്യമെന്ന് ചൈന ഒാർമിക്കുന്നത് നല്ലതാണെന്ന് ജെയ്‍റ്റ്‍ലി പറഞ്ഞു. ഇന്ത്യൻ സൈന്യം അതിർത്തി കടന്നുവെന്ന ചൈനയുടെ ആരോപണം തെറ്റാണെന്നും ജെയ്റ്റ്ലി വ്യക്തമാക്കി.

china tries to possess indian border says external affairs ministry