മോദിയുമായുള്ള കൂടിക്കാഴ്ച സൗഹാർദ്ദപരമെന്ന് പിണറായി

പ്രധാനമന്ത്രി മോദിയുമായി ഡൽഹിയിൽ നടന്ന കൂടിക്കാഴ്ച സൗഹാർദ്ദപരമെന്ന് മുഖ്യമന്ത്രി പിണറായി വിജയൻ. റബറിന്‍റെ താങ്ങുവിലയ്ക്ക് കേന്ദ്രം തത്വത്തിൽ അംഗീകാരം നൽകാന്‍ ചർച്ചയിൽ സന്നദ്ധത അറിയിച്ചിതയാും അദ്ദേഹം വ്യക്തമാക്കി. കുറഞ്ഞവിലയ്ക്ക് റബ്ബറിന്‍റെ സംഭരണം ഉറപ്പാക്കും. കേന്ദ്ര-സംസ്ഥാനസര്‍ക്കാരുകള്‍ ഇതിനായി യോജിച്ച് പ്രവര്‍ത്തിക്കും. കേരളത്തിന് എല്ലാ സാമ്പത്തിക പിന്തുണയും മോദി ഉറപ്പ് നല്‍കിയതായും അദ്ദേഹം പറഞ്ഞു. രണ്ട് കാര്യങ്ങളില്‍ രാജ്യത്തിന് കേരളം മാതൃകയാവാനാവുമെന്നും മോദി പറഞ്ഞതായി അദ്ദേഹം വ്യക്തമാക്കി. സമ്പൂര്‍ണ്ണ ഡിജിറ്റല്‍ സംസ്ഥാനം, എല്ലാവര്‍ക്കും ശാൗചാലയം എന്നീ നിര്‍ദ്ദേശങ്ങള്‍ വേഗത്തിൽ നടപ്പിലാക്കും

ഗെയ്ല്‍ പൈപ്പ് ലൈൻ വിഷയത്തിൽ ഇപ്പോഴുള്ള തടസ്സങ്ങള്‍ മാറ്റുന്നതിനും ധാരണയായി. ബിജെപി-സിപിഎം സംഘര്‍ഷങ്ങള്‍ തീര്‍ക്കുന്നതിനും മോദി ആവശ്യപ്പെട്ടതായി പിണറായി പറഞ്ഞു. ദേശീയപാത നിര്‍മ്മാണത്തിന് റബ്ബര്‍ ഉപയോഗിക്കാന്‍ കേരളം ആവശ്യപ്പെട്ടിട്ടുമുണ്ട്. 45 മീറ്ററിൽ തന്നെ ദേശീയപാത വികസനം ധാരണയായിട്ടുണ്ട്. ഇതിനായി വിശദമായ പദ്ധതിരേഖ നടപ്പിലാക്കാന്‍ ആവശ്യപ്പെട്ടു.

റയില്‍വേ വികസനം വേഗത്തിൽ നടപ്പിലാക്കി അതിവേഗ തീവണ്ടികള്‍ വരുത്തുന്നതിനും ധാരണായായിട്ടുണ്ട്. ആദിവാസി പ്രശ്നം പ്രശ്നപരിഹാരത്തിന് ആവശ്യമായ ഇടപെടലുണ്ടാകമെന്നും ടൂറിസം രംഗത്ത് ഏറെ മാറ്റങ്ങള്‍ കൊണ്ടുവരുന്നതിനും കേരളത്തെ ഒരു ടൂറിസം ഹബ്ബാക്കാനും ച‍‍ർച്ചയിൽ മോദി ആവശ്യപ്പെട്ടതായും അദ്ദേഹം കൂട്ടിച്ചേ‍ർത്തു. മുല്ലപ്പെരിയാറില്‍ അനാവശ്യവിവാദം വേണ്ട, തമിഴ്നാടുമായി ചര്‍ച്ചചെയ്ത് പരിഹാരം ഉടനുണ്ടാക്കുമെന്നും അദ്ദേഹം പറഞ്ഞു.