തീവ്രവാദികളും നാഥുറാമും പാർലമെന്റിൽ ഇരുന്നാലും കർഷകരെ ഡൽഹിയിലേക്ക് പ്രവേശിപ്പിക്കില്ല; കൊള്ളാം മോദി ജീ; കുനാൽ കമ്ര

ന്യൂഡൽഹി: കർഷക വിരുദ്ധ നിയമങ്ങൾക്കെതിരെയുള്ള കർഷകരുടെ സമരത്തെ അടിച്ചമർത്തുന്ന കേന്ദ്രസർക്കാരിന്റെ നയങ്ങൾക്കെതിരെ സ്റ്റാന്റപ്പ് കൊമേഡിയൻ കുനാൽ കമ്ര. മഹാത്മാഗാന്ധിയെ വെടിവെച്ച് കൊന്ന നാഥുറാമും തീവ്രവാദ കേസിൽ ആരോപിതയായ എംപിയും പാർലമെന്റിൽ ഇരിക്കുന്നതിനെ മഹത്വവത്കരിക്കുന്നവർ കർഷകരെ ഡൽഹിയിലേക്ക് കടത്തിവിടുന്നില്ലെന്ന് കുനാൽ കമ്ര ട്വീറ്റ് ചെയ്തു.

"തീവ്രവാദ കേസിൽ ആരോപിതയായ എംപിയും, നാഥുറാമും പാർലമെന്റിൽ ഇരിക്കുന്നതിനെ മഹത്വവൽകരിക്കും. എന്നാൽ തങ്ങളുടെ അവകാശങ്ങൾക്കായി പോരാടുന്ന കർഷകരെ ഡൽഹിയിലേക്ക് പ്രവേശിക്കാൻ അനുവദിക്കില്ല. കൊള്ളാം മോദിജീ കൊള്ളാം." എന്നാണ് കുനാലിന്റെ ട്വീറ്റ്.

Also Read: അഭിപ്രായ വ്യത്യാസങ്ങൾ പരിഹരിക്കാം; കർഷകരുമായി ചർച്ചയ്ക്ക് തയ്യാറെന്ന് കേന്ദ്ര കൃഷി മന്ത്രി

അതേസമയം, കർഷകർ സമരത്തിൽ നിന്നും പിന്മാറണമെന്ന് കേന്ദ്ര കൃഷി മന്ത്രി നരേന്ദ്രസിങ് തോമർ ആവശ്യപ്പെട്ടു. പ്രക്ഷോഭം നടത്തരുതെന്ന് സഹോദരങ്ങളോട് ആഭ്യർത്ഥിക്കുകയാണ്. പ്രശ്നങ്ങളെക്കുറിച്ച് ചർച്ചചെയ്യാനും പരിഹരിക്കാനും തങ്ങൾ തയ്യാറാണ്- തോമർ പറഞ്ഞു.

കാർഷിക നിയമം വരാനിരിക്കുന്ന കാലത്ത് വിപ്ലവം സൃഷ്ടിക്കുമെന്ന് തോമർ അവകാശപ്പെട്ടു. സമരത്തിൽ പങ്കെടുത്ത സ്വരാജ് അഭിയാൻ നേതാവും സാമൂഹിക പ്രവർത്തകനുമായ യോഗേന്ദ്ര യാദവിനെ പോലീസ് കസ്റ്റഡിയിലെടുത്തു. ഗുരുഗ്രാമിൽ വെച്ചായിരുന്നു നടപടി.