'മൂന്നാം ഘട്ടത്തിലേക്ക്?' സാമൂഹ്യ വ്യാപനം ചിലയിടങ്ങളിൽ ആരംഭിച്ച് കഴിഞ്ഞെന്ന് എയിംസ് ഡയറക്ടർ

രാജ്യത്ത് കൊവിഡ്-19 ബാധിച്ച് മരിച്ചവരുടെ എണ്ണം 109 ആയി ഉയർന്നിരിക്കുകയാണ്. 24 മണിക്കൂറിനിടെ 32 പേർ മരിച്ചതോടെയാണ് മരണസംഖ്യ 100 കടന്നത്. 505 പുതിയ കേസുകൾ റിപ്പോര്‍ട്ട് ചെയ്തതോടെ രോഗബാധിതരുടെ എണ്ണം മൂവായിരത്തി അഞ്ഞൂറ്റി എഴുപത്തേഴായും ഉയർന്നു. രാജ്യമെമ്പാടുമായി 274 ജില്ലകളില്‍ കൊവിഡ് ബാധിച്ച് കഴിഞ്ഞിരിക്കുകയാണ്. ലോക്ക് ഡൗണിലൂടെ കടന്ന് പോകുന്നതിനിടെയാണ് ഈ വർധനവുകൾ റിപ്പോർട്ട് ചെയ്യപ്പെടുന്നതെന്നതും ശ്രദ്ധേയമാണ്.

ഒരു മാധ്യമവുമായി സംസാരിക്കവെ എംയിസ് ഡയറക്ടർ ഡോ. രൺദീപ് ഗുലേരിയയാണ് ചിലയിടങ്ങളിൽ സാമൂഹ്യ വ്യാപനം നടന്നെന്ന കാര്യം പറഞ്ഞത്. എന്നാൽ ഇന്ത്യ ഇപ്പോഴും രണ്ടാം ഘട്ടത്തിനും മൂന്നാം ഘട്ടത്തിനും ഇടയിലാണെന്നും അദ്ദേഹം വ്യക്തമാക്കി. 'ചില സ്ഥലങ്ങളിൽ കേസുകൾ കുത്തനെ വർധിച്ചിട്ടുണ്ട്. മുംബൈ പോലുള്ള ചില പ്രദേശങ്ങളിൽ പ്രാദേശിക സാമൂഹ്യ വ്യാപനവും ശ്രദ്ധയിൽ പെട്ടിട്ടുണ്ട്. എന്നാൽ നമ്മൾ ഇപ്പോഴും രണ്ടാംഘട്ടത്തിനും മൂന്നാംഘട്ടത്തിനും ഇടയിൽ തന്നെയാണ്' അദ്ദേഹം പറഞ്ഞു.

രാജ്യത്ത് കൊവിഡ് കേസുകൾ വർധിക്കുകയാണെങ്കിലും ഭൂരിഭാഗം പ്രദേശങ്ങളും ഇപ്പോഴും രണ്ടാംഘട്ടത്തിൽ തന്നെയാണെന്നും എംയിസ് ഡയറക്ടർ പറഞ്ഞു. ചിലയിടങ്ങളിൽ പ്രാദേശിക തലത്തിലുള്ള സാമൂഹ്യ വ്യാപനമാണ് കാണുന്നതെന്നും അദ്ദേഹം കൂട്ടിച്ചേർത്തു. 'ചില ഹോട്സ്പോട്ടുകളിലാണ് പ്രാദേശിക സാമൂഹ്യ വ്യാപനം കാണുന്നത്. ഇത് പ്രാരംഭഘട്ടത്തിൽ തന്നെ തടയുകയാണെങ്കിൽ പേടിക്കേണ്ട കാര്യമൊന്നുമില്ല. പ്രാദേശിക സാമൂഹ്യ വ്യാപനം ആരംഭിച്ചതിനാൽ കൂടുതൽ ജാഗ്രത പാലിക്കേണ്ടത് ആവശ്യമാണ്' എയിംസ് ഡയറക്ടർ പറയുന്നു.

കഴിഞ്ഞ മാസം ഡൽഹി നിസാമുദ്ദീനിൽ നടന്ന തബ് ലീഗ് ജമാഅത്ത് കൊവിഡ്-19 കേസുകളുടെ വർധനവിന് കാരണമായിട്ടുണ്ടെന്നും ഗുലേരിയ പറഞ്ഞു. പരിപാടിയിൽ പങ്കെടുത്തതോ അല്ലെങ്കിൽ പങ്കെടുത്ത ഒരാളുമായോ സമ്പർക്കം പുലർത്തുന്ന എല്ലാവരേയും കണ്ടെത്തേണ്ടത് പ്രധാനമാണെന്നും അദ്ദേഹം ചൂണ്ടിക്കാട്ടി. വൈറസ് ബാധ പകരാൻ സാധ്യത കൂടുതലുണ്ടെന്ന് മനസിലാക്കിയാണ് തങ്ങളും കഴിയുന്നതെന്നും ജനങ്ങൾ ഡോക്ടർമാരെ പിന്തുണക്കേണ്ടതുണ്ടെന്നും ഡോക്ടർ പറഞ്ഞു.

രാജ്യത്ത് 21 ദിവസത്തെ ലോക്ക് ഡൗൺ നീട്ടേണ്ടി വരുമോയെന്ന ചോദ്യത്തോട് പ്രതികരിച്ച ഗുലേരിയ ഇതിൽ ഏപ്രിൽ 10 ആകുമ്പോഴേക്ക് മാത്രമെ വ്യക്തത വരികയുള്ളൂവെന്നും പറഞ്ഞു. ' ഏപ്രിൽ 10 ന് ശേഷം കൂടുതൽ വിവരങ്ങൾ ലഭ്യമാകുമെന്നാണ് ഞങ്ങൾ പ്രതീക്ഷിക്കുന്നത്. അപ്പോൾ മാത്രമേ ലോക്ക് ഡൗൺ നീട്ടണമോ വേണ്ടയോ എന്ന് പറയാൻ ഞങ്ങൾക്ക് കഴിയൂ. സ്ഥിതിഗതികൾ സാധാരണ നിലയിലാകാൻ കുറച്ച് സമയമെടുക്കും'. എയിംസ് ഡയറക്ടർ കൂട്ടിച്ചേർത്തു.