ഛത്തീസ്‍ഗഡ് മുഖ്യമന്ത്രിയായി ഭൂപേഷ് ഭാഗേലിനെ പ്രഖ്യാപിച്ചു

റായ്‍പൂര്‍: ഛത്തീസ്‍ഗഡ് പിസിസി അധ്യക്ഷന്‍ ഭൂപേഷ് ഭാഗേലിനെ മുഖ്യമന്ത്രിയായ പ്രഖ്യാപിച്ചു. ഇന്ന് ഉച്ചയ്ക്കുശേഷം നടന്ന കോണ്‍ഗ്രസ് നിയമസഭാ കക്ഷിയോഗത്തിലാണ് ഭാഗേലിനെ മുഖ്യമന്ത്രിയായി തിരഞ്ഞെടുത്തത്.


കഴിഞ്ഞ നാല് ദിവസമായി രാഹുല്‍ ഗാന്ധിയുടെ നേതൃത്വത്തില്‍ നടന്ന ചര്‍ച്ചകള്‍ക്കൊടുവിലാണ് ഭാഗേലിനെ തിരഞ്ഞെടുത്തത്. ഭൂപേഷ് ബാഗലിനെ കൂടാതെ മുന്‍ പ്രതിപക്ഷ നേതാവ് ടിഎസ് സിംഗ്ദോ, ഒബിസി നേതാവ് തമരദ്വജ് സാഹു, മുന്‍ മന്ത്രിയും മുതിര്‍ന്ന നേതാവുമായ ചരണ്‍ദാസ് മഹന്ദ് എന്നിവരുടെ പേരുകളാണ് മുഖ്യമന്ത്രി സ്ഥാനത്തേക്ക് ഉയര്‍ന്നു വന്നത്. ഇവരുമായി നേരിട്ട് ഇന്നലെ രാഹുല്‍ ഗാന്ധി ഡല്‍ഹിയില്‍ ചര്‍ച്ച നടത്തിയിരുന്നു. ഛത്തീസ്ഗഡിന്‍റെ തിരഞ്ഞെടുപ്പ് ചുമതല വഹിക്കുന്ന പിഎല്‍ പുനിയ മുഖ്യമന്ത്രി തിങ്കളാഴ്ച സത്യപ്രതിജ്ഞ ചെയ്യുമെന്ന് അറിയിച്ചിരുന്നു.

തുടര്‍ച്ചയായ 15 കൊല്ലത്തെ ബിജെപി ഭരണത്തെയാണ് ഈ തിരഞ്ഞെടുപ്പില്‍ കോണ്‍ഗ്രസ് തൂത്തെറിഞ്ഞത്. 90 സീറ്റുകളില്‍ 68 സീറ്റും നേടിയാണ് കോണ്‍ഗ്രസ് ഭരണം പിടിച്ചെടുത്തത്. മുഖ്യമന്ത്രിയുടെ സത്യാപ്രതിജ്ഞാ ചടങ്ങ് നാളെ നടക്കുമെന്ന് എഐസിസിയുടെ ഛത്തീസ്ഗഡ് നിരീക്ഷകന്‍ മല്ലികാര്‍ജുന്‍ ഖാര്‍ഗെ അറിയിച്ചു.