രാമക്ഷേത്രനി‍ര്‍മാണത്തിന് തടസ്സം നിന്നത് കോൺഗ്രസ്: യോഗി ആദിത്യനാഥ്

റായ്‍‍പൂര്‍: അയോധ്യയിലെ രാമക്ഷേത്രനിര്‍മാണത്തിന് തടസ്സം നിന്നത് കോൺഗ്രസാണെന്ന് ഉത്തര്‍ പ്രദേശ് മുഖ്യമന്ത്രി യോഗി ആദിത്യനാഥ്. കോൺഗ്രസ് ഉള്ള കാലത്തോളം ഹിന്ദുക്കളുടെ അഭിമാനം സംരക്ഷിക്കപ്പെടില്ലെന്ന് ഛത്തീസ്‍‍ഗഡിലെ തെരഞ്ഞെടുപ്പ് സമ്മേളനത്തിൽ അദ്ദേഹം പറഞ്ഞു.

അയോധ്യ കേസിൽ വാദം കേള്‍ക്കുന്നത് നീട്ടിവെക്കാൻ കോൺഗ്രസ് നേതാവ് കപിൽ സിബൽ സുപ്രീം കോടതിയെ സമീപിച്ച സംഭവമായിരുന്നു യോഗിയുടെ പ്രസ്താവനയ്ക്ക് ആധാരം. കോൺഗ്രസിന്‍റെ ശ്രമം രാമക്ഷേത്രനിര്‍മാണം തടസ്സപ്പെടുത്താനാണെന്നും എന്നാൽ രാഹുൽ ഗാന്ധിയുടെ ക്ഷേത്രസന്ദര്‍ശനം രാഷ്ട്രീയനേട്ടത്തിനാണെന്നും യോഗി ആദിത്യനാഥ് ആരോപിച്ചു.

രാഹുൽ ഗാന്ധി ഹിന്ദുക്കളെ തീവ്രവാദികളായി ചിത്രീകരിക്കുകയാണ്. വിദേശരാജ്യങ്ങളിൽ സംസാരിക്കുമ്പോള്‍ ഇന്ത്യയിലെ ഹിന്ദുക്കളെ തീവ്രവാദികള്‍ എന്നാണ് രാഹുൽ പറയുന്നത്. തനിക്ക് ഇന്ത്യൻ ഹിന്ദുക്കളായ തീവ്രവാദികളിൽ നിന്ന് ഭീഷണിയുണ്ടെന്ന് രാഹുൽ ഗാന്ധി അമേരിക്കൻ അംബാസഡറോട് പറഞ്ഞെന്നും യോഗി ആദിത്യനാഥ് പറഞ്ഞു.

കോൺഗ്രസ് ജാതിയുടെയും ദേശത്തിന്‍റെയും പേരിൽ ജനങ്ങളെ വിഘടിപ്പിച്ചെന്ന് യോഗി ആദിത്യനാഥ് പറഞ്ഞു. തീവ്രവാദം, വിഘടനവാദം, നക്സലിസം, അഴിമതി, കുടുംബവാഴ്ച തുടങ്ങിയവയാണ് സ്വാതന്ത്ര്യത്തിനു ശേഷം കോൺഗ്രസ് ഇന്ത്യയ്ക്ക് സംഭാവന നല്‍കിയത്. കോൺഗ്രസ് ഭീകരവാദത്തെ പ്രോത്സാഹിപ്പിക്കുകയും സൈനികരുടെ രക്തസാക്ഷിത്വത്തെ അപമാനിക്കുകയും ചെയ്തെന്ന് യോഗി ആരോപിച്ചു.നക്സലൈറ്റുകളെ കോൺഗ്രസ് വിപ്ലവകാരികള്‍ എന്നാണ് വിളിക്കുന്നതെന്നും ആദിത്യനാഥ് ആരോപിച്ചു.