സച്ചിൻ പൈലറ്റ് ഇനി ആർക്കൊപ്പം? പുതിയ നീക്കവുമായി കോൺഗ്രസ്, ചർച്ചയ്‌ക്ക് തയ്യാറെന്ന് സുർജെവാല

ന്യൂഡൽഹി: രാഷ്‌ട്രീയ പ്രതിസന്ധി തുടരുന്ന രാജസ്ഥാനിൽ സച്ചിന്‍ പൈലറ്റുമായി സമവായ ചർച്ചകൾക്ക് വഴിതുറന്നിട്ട് കോൺഗ്രസ്. നിലപാടുകൾ പാർട്ടിക്കുള്ളിലാണ് പറയേണ്ടതെന്നും സച്ചിനുമായി ഇനിയും ചർച്ചയ്‌ക്ക് തയ്യാറാണെന്നും കോൺഗ്രസ് വക്താവ് രൺദീപ് സിംഗ് സുർജെവാല പറഞ്ഞു.

Also Read: ബിജെപിയിലേക്കോ? കോണ്‍ഗ്രസ് അംഗമെന്ന വിവരണം ട്വിറ്ററിൽ നിന്നും നീക്കം ചെയ്‌ത് സച്ചിൻ പൈലറ്റ്

സച്ചിൻ പൈലറ്റിനെ ഉപമുഖ്യമന്ത്രിസ്ഥാനത്തുനിന്നും പിസിസി അധ്യക്ഷസ്ഥാനത്തുനിന്നും നീക്കി കൊണ്ടുള്ള കോൺഗ്രസ് തീരുമാനം കഴിഞ്ഞ ദിവസമാണ് ഉണ്ടായത്. ഇതോടെ സച്ചിൻ കോൺഗ്രസ് ബന്ധം അവസാനിപ്പിക്കുമെന്ന വാർത്തകൾ പുറത്തുവന്നു. എന്നാൽ താൻ ബിജെപിയിലേക്ക് പോകില്ല. ഇപ്പോഴും കോൺഗ്രസുകാരൻ തന്നെയാണെന്നും അദ്ദേഹം വ്യക്തമാക്കി. ഈ സാഹചര്യത്തിലാണ് സച്ചിനുമായി ചർച്ചയ്‌ക്ക് തയാറാണെന്ന് കോൺഗ്രസ് നേതൃത്വം വ്യക്തമാക്കിയത്.

"സച്ചിനുമായി ചർച്ചയ്‌ക്ക് ഒരുക്കമാണ് കോൺഗ്രസ്. പറായാനുള്ള കാര്യങ്ങൾ മാധ്യമങ്ങളിലൂടെയല്ല വ്യക്തമാക്കേണ്ടത്. പാർട്ടിക്കകത്ത് കാര്യങ്ങൾ തുറന്ന് പറയണം. രാജസ്ഥാനിലെ കോൺഗ്രസ് സർക്കാരിനെ താഴെയിറക്കാനുള്ള ബിജെപിയുടെ നീക്കം പൊളിഞ്ഞു" - എന്നും സുർജെവാല പറഞ്ഞു.

Also Read: ബിജെപിയിലേക്കില്ല, കോണ്‍ഗ്രസ് എംഎൽഎ ആയി തുടരും։ നിലപാട് വ്യക്തമാക്കി സച്ചിൻ പൈലറ്റ്

താൻ ബിജെപിയിലേക്കില്ലെന്ന് സച്ചിൻ വ്യക്തമാക്കിയിരുന്നു. "താൻ ബിജെപിയിൽ ചേരുവാന്‍ ഉദ്ദേശിക്കുന്നില്ല. ബിജെപിയേമായി തന്റെ പേര് ചേര്‍ത്ത് പറയുന്നത് കോണ്‍ഗ്രസ് ഹൈക്കമാൻഡിൻ്റെ കണ്ണിൽ അപകീര്‍ത്തി പെടുത്താനുള്ള ശ്രമത്തിൻ്റെ ഭാഗമാണ്. താൻ ഇപ്പോഴും കോണ്‍ഗ്രസ് അംഗമാണ്. ബിജെപിയെ തോല്‍പ്പിക്കുന്നതിന് അഹോരാത്രം കഷ്ടപ്പെട്ടയാളാണ് താൻ. രാജസ്ഥാനിലെ ചില നേതാക്കള്‍ താന്‍ ബിജെപിയിൽ ചേരുന്നതായുള്ള അഭ്യൂഹങ്ങള്‍ക്ക് ഉയർത്തി. എന്നാല്‍ അത് തെറ്റാണ്. രാജസ്ഥാനിൽ കോണ്‍ഗ്രസ് സര്‍ക്കാരിനെ തിരികെ എത്തിക്കുന്നതിന് വേണ്ടി താൻ വളരെയധികം കഷ്ടപ്പെട്ടിട്ടുണ്ട്" - എന്നും അദ്ദേഹം പറഞ്ഞു.