പാവങ്ങൾക്കുളള അരി കൊണ്ട് സാനിറ്റൈസര്‍ ഉണ്ടാക്കരുത്: മുന്നറിയിപ്പുമായി രാഹുൽ ഗാന്ധി

ന്യൂഡൽഹി: രാജ്യത്ത് കൂടുതല്‍ സാനിറ്റൈസര്‍ ഉൽപ്പാദിപ്പിക്കാനായി അരി ഉപയോഗിക്കുമെന്ന റിപ്പോര്‍ട്ടുകള്‍ക്കിടെ കേന്ദ്രസര്‍ക്കാരിനെതിരെ വിമര്‍ശനവുമായി രാഹുൽ ഗാന്ധി. പാവങ്ങള്‍ വിശന്നു മരിക്കുമ്പോള്‍ സര്‍ക്കാര്‍ അരി ഉപയോഗിച്ച് സാനിറ്റൈസര്‍ ഉണ്ടാക്കുകയാണെന്ന് രാഹുൽ ഗാന്ധി വിമര്‍ശിച്ചു.

എന്നാണ് ഇന്ത്യയിലെ പാവങ്ങള്‍ ഉണരുന്നതെന്ന് രാഹുൽ ഗാന്ധി ചോദിച്ചു. നിങ്ങൾ ‍വിശന്നു മരിക്കുമ്പോള്‍ ധനികര്‍ നിങ്ങള്‍ക്കുള്ള അരി കൊണ്ടുണ്ടാക്കിയ സാനിറ്റൈസര്‍ ഉപയോഗിച്ച് കൈ വൃത്തിയാക്കുകയാണ്. രാഹുൽ ഗാന്ധി ട്വീറ്റില്‍ കുറിച്ചു. രാജ്യത്ത് അധികമായി വരുന്ന അരി, സാനിറ്റൈസര്‍ നിര്‍മാണത്തിനായി ഉപയോഗിക്കുമെന്ന വാര്‍ത്തയുടെ ലിങ്ക് പങ്കുവെച്ചുകൊണ്ടായിരുന്നു രാഹുൽ ഗാന്ധിയുടെ ട്വീറ്റ്.

Also Read: COVID 19 LIVE: നിയന്ത്രണങ്ങൾ ഉടൻ നീക്കരുത്: മുന്നറിയിപ്പുമായി WHO

തിങ്കളാഴ്ചയാണ് കേന്ദ്രസര്‍ക്കാര്‍ ഫുഡ് കോര്‍പ്പറേഷൻ ഓഫ് ഇന്ത്യയുടെ കൈവശം മിച്ചമുള്ള അരി എഥനോള്‍ നിര്‍മാണത്തിനായി ഉപയോഗിക്കാൻ അനുമതി നൽകിയത്. സാനിറ്റൈസ‍ര്‍ നി‍ര്‍മാണത്തിന് ആവശ്യമായ അസംസ്കൃത വസ്തുവാണ് എഥനോള്‍. നാഷണല്‍ ബയോഫ്യൂവല്‍ കോര്‍ഡിനേഷൻ കമ്മിറ്റിയുടെ യോഗത്തിലാണ് വിഷയത്തില്‍ തീരുമാനമുണ്ടായത്.

Also Read: ഡേറ്റ ചോരില്ലെന്ന് സർക്കാരിന് ഉറപ്പുണ്ടോ?; സ്പ്രിംഗ്ലര്‍ ഇടപാടിൽ ഹൈക്കോടതിയുടെ വിമർശനം

കൊവിഡ് 19 സമൂഹവ്യാപനം തടയാനായി ലോകാരോഗ്യ സംഘടനയടക്കം ഹാൻഡ് സാനിറ്റൈസറുകളുടെ ഉപയോഗം പ്രോത്സാഹിപ്പിക്കുന്നതുണ്ട്. സോപ്പോ ആൽക്കഹോള്‍ അടങ്ങിയ ഹാൻഡ് സാനിറ്റൈസറോ ഉപയോഗിച്ച് കൈകള്‍ ഇടയ്ക്കിടെ വൃത്തിയാക്കാനും മുഖത്ത് അനാവശ്യമായി സ്പര്‍ശിക്കുന്നത് ഒഴിവാക്കാനുമാണ് ആരോഗ്യ ഏജൻസികള്‍ നൽകുന്ന നി‍ര്‍ദേശം.