8000 കോടിയുടെ വിമാനം ആരും കണ്ടില്ല; കുഷ്യൻ കണ്ടു: ബിജെപിക്കെതിരെ ആഞ്ഞടിച്ച് രാഹുൽ

ചണ്ഡീഗഡ്: ട്രാക്ടറിൽ ഇരിക്കാൻ കുഷ്യൻ ഉപയോഗിച്ചതിനെ വിമർശിച്ച ബിജെപിക്കെതിരെ തിരിച്ചടിച്ച് രാഹുൽ ഗാന്ധി. നികുതിദായകരുടെ എണ്ണായിരം കോടി രൂപ ഉപയോഗിച്ച് പ്രധാനമന്ത്രി വാങ്ങിയ എയർ ഇന്ത്യ വിമാനത്തിൽ കുഷ്യൻ മാത്രമല്ല അദ്ദേഹത്തിന്റെ സുഖ സൗകര്യത്തിനായി നിരവധി കിടക്കകളുണ്ടെന്നും രാഹുൽ പറഞ്ഞു.

സുഹൃത്ത് ട്രംപിന് വിവിഐപി വിമാനം ഉള്ളതുകൊണ്ടാണ് മോദി ഇങ്ങനെ ചെയ്തതെന്ന് രാഹുൽ പറഞ്ഞു. ട്രാക്ടറിൽ കുഷ്യനിട്ട് ഇരുന്നതിനെപ്പറ്റി ചോദ്യം ചോദിച്ച മാധ്യമ പ്രവ‍ര്‍ത്തകരോടായിരുന്നു അദ്ദേഹത്തിന്റെ മറുപടി. വൻ തുകയ്ക്ക് വിമാനം വാങ്ങിയ അവരോട് ചോദ്യം ചോദിക്കാത്തത് എന്തുകൊണ്ടാണെന്നും രാഹുൽ ചോദിച്ചു.

Also Read: "ജർമ്മനി തകർക്കപ്പെടുംവരെ ഹിറ്റ്‌ലറെ ജനങ്ങൾ രാജ്യസ്നേഹിയായി കണ്ടു"; മോദിയെ വിമർശിച്ച് വിജേന്ദർ സിങ്

കാ‍ര്‍ഷിക ബില്ലിനെതിരെയുള്ള പ്രതിഷേധത്തിന്റെ ഭാഗമായി പഞ്ചാബിൽ നിന്നും ഹരിയാനയിലേക്ക് പോകുമ്പോൾ മുഖ്യമന്ത്രി അമരീന്ദ‍ര്‍ സിങ്ങിനോടൊപ്പം നടത്തിയ വാര്‍ത്താ സമ്മേളനത്തിലാണ് രാഹുൽ ഇക്കാര്യം പറഞ്ഞത്. വിവിഐപി വിമാനം വാങ്ങുന്നതിനായി ആയിരക്കണക്കിന് കോടി രൂപ ചെലവഴിച്ച പ്രധാനമന്ത്രിയുടെ നടപടിക്കെതിരെയാണ് രാഹുലിന്റെ വിമ‍ര്‍ശനം.

ക‍ര്‍ഷക റാലിയിൽ പങ്കെടുക്കവെയാണ് ട്രാക്ടറിൽ ഇരിക്കാൻ രാഹുൽ കുഷ്യൻ ഉപയോഗിച്ചത്. ഇതിനെതിരെ കേന്ദ്ര മന്ത്രി ഹ‍ര്‍ദീപ് പുരി അടക്കമുള്ളവ‍ര്‍ രംഗത്തെത്തിയ സാഹചര്യത്തിലാണ് രാഹുലിന്റെ മറുപടി.