ഹിന്ദുരാജ്യമല്ല, ബിജെപി ഉണ്ടാക്കുന്നത് സംഘി ഹിന്ദുത്വ രാജ്യം; തുറന്നടിച്ച് ശശി തരൂർ

ന്യൂഡൽഹി: ബിജെപി ഇന്ത്യയിൽ ഉണ്ടാക്കാൻ ശ്രമിക്കുന്നത് പാകിസ്ഥാൻ്റെ ഹിന്ദു പതിപ്പാണെന്ന് കോൺഗ്രസ് നേതാവ് ശശി തരൂര്‍. 1947ലെ മുസ്ലീം വര്‍ഗീയവാദത്തിൻ്റെ പകര്‍പ്പാണ് ഹിന്ദുത്വ വാദമെന്നും ശശി തരൂര്‍ വാദിച്ചു. ഹിന്ദുത്വ ഒരു രാഷ്ട്രീയ ആശയമാണെന്നും മതവിശ്വാസമല്ലെന്നും ശശി തരൂര്‍ തന്‍റെ പുതിയ പുസ്തകത്തിൽ വ്യക്തമാക്കി.

"ദ ബാറ്റിൽ ഓഫ് ബിലോങിങ്" (The Battle of Belonging) എന്ന തൻ്റെ പുതിയ പുസ്കതത്തിലാണ് ബിജെപിയ്ക്കെതിരെ ശശി തരൂരിൻ്റെ ശക്തമായ ആരോപണങ്ങള്‍. ശനിയാഴ്ചയാണ് പുസ്തകം പുറത്തിറങ്ങിയത്. "ഹിന്ദു ഇന്ത്യ" ഹിന്ദുവായിരിക്കില്ലെന്നും "സംഘി ഹിന്ദുത്വ രാജ്യ"മായിരിക്കുമെന്നും അത് മൊത്തത്തിൽ മറ്റൊരു രാജ്യമായിരിക്കുമെന്നും ശശി തരൂര്‍ വ്യക്തമാക്കി. "നാം സ്നേഹിക്കുന്ന ഇന്ത്യയെ സംരക്ഷിക്കാനാണ് എന്നെപ്പോലുള്ള ആളുകള്‍ ശ്രമിക്കുന്നത്, അല്ലാതെ നാം സ്നേഹിക്കുന്ന രാജ്യത്തെ ഒരു മതരാജ്യമാക്കി മാറ്റാനല്ല." ശശി തരൂര്‍ വ്യക്തമാക്കി.

Also Read: തെറ്റായ കൂട്ടുകെട്ടില്‍ പെട്ടിട്ടുണ്ടെങ്കില്‍ അവര്‍ ഭവിഷ്യത്ത് അനുഭവിക്കണം; എല്ലാവര്‍ക്കും ബാധകം: എം എ ബേബി

ഇന്ത്യ തള്ളിക്കളഞ്ഞ വഞ്ചനാപരമായ മതഭ്രാനതാണ് ഹിന്ദുത്വ ആശയം മുന്നോട്ടു വെക്കുന്നതെന്നും തരൂര്‍ പറയുന്നു. കേന്ദ്രസര്‍ക്കാര്‍ അടുത്തിടെ കൊണ്ടുവന്ന വിവാദ നിയമമായ പൗരത്വ നിയമ ഭേദഗതിയെയും ആലിഫ് ബുക് കമ്പനി പ്രസിദ്ധീകരിച്ച പുസ്തകത്തിൽ ശശി തരൂര്‍ വിമര്‍ശിക്കുന്നുണ്ട്.

"ഹിന്ദു പാകിസ്ഥാൻ" എന്ന തലക്കെട്ടിലുള്ള അധ്യായത്തിലാണ് ബിജെപി നേതൃത്വത്തിനെതിരെ തരൂര്‍ ശക്തമായ പ്രതിഷേധമുയര്‍ത്തുന്നത്. "പാകിസ്ഥാൻ്റെ ഹിന്ദുത്വ പതിപ്പ് ഉണ്ടാക്കാനുള്ള ഭരണകക്ഷിയുടെ ശ്രമത്തെയാണ് ഞാൻ എതിര്‍ക്കുന്നത്. അതിനു വേണ്ടിയല്ല നാം സ്വാതന്ത്ര്യ സമരത്തിൽ പോരായിടത്. അതല്ല ഇന്ത്യൻ ഭരണഘടന മുന്നോട്ടു വെക്കുന്ന ആശയം." തരൂര്‍ കുറിച്ചു. ഇത് സംരക്ഷിക്കേണ്ടത് ന്യൂനപക്ഷങ്ങളുടെ ആവശ്യം മാത്രമല്ലെന്നും ഒറ്റ മതം മാത്രമുള്ള പാകിസ്ഥാനിലെ ജനങ്ങള്‍ അനുഭവിക്കുന്നതു പോലെ ജീവിക്കാൻ തന്നെപ്പോലെ ആത്മാഭിമാനമുള്ള ഹിന്ദുക്കള്‍ക്കും താത്പര്യമില്ലെന്നും തരൂര്‍ കുറിച്ചു.

Also Read: ഏറ്റവും ശക്തമായ ചുഴലിക്കാറ്റിന്റെ ഭീഷണിയിൽ ഫിലിപ്പിൻസ്; ഒഴിപ്പിക്കൽ നടപടി ശക്തം

കഴിഞ്ഞ വര്‍ഷം ശശി തരൂര്‍ നടത്തിയ "ഹിന്ദു പാകിസ്ഥാൻ" പരാമര്‍ശം വലിയ വിവാദമായിരുന്നു. അതേസമയം, സ്വാമി വിവേകാനന്ദൻ മുന്നോട്ടു വെക്കുന്ന ഹിന്ദുമതം വ്യത്യാസങ്ങളെ സ്വീകരിക്കാൻ പ്രോത്സാഹിപ്പിക്കുന്നതാണെന്നും ശശി തരൂര്‍ പുസ്തകത്തിൽ കുറിച്ചു.