'പ്രധാനമന്ത്രീ, ഈ പഴയ ട്വീറ്റ് ഓർക്കുന്നുണ്ടോ?' ലഡാഖിലെ പിന്മാറ്റത്തിൽ സംശയവുമായി കോൺഗ്രസ് വക്താവ്

ന്യൂഡൽഹി: ഉഭയകക്ഷി ചര്‍ച്ചകള്‍ക്കു ശേഷം ലഡാഖിൽ നിയന്ത്രണ രേഖയ്ക്ക് സമീപത്തു നിന്ന് ഇന്ത്യ - ചൈന സൈന്യങ്ങള്‍ പിന്മാറുന്നതിനിടെ കേന്ദ്രസര്‍ക്കാരിനെതിരെ കോൺഗ്രസ്. പ്രധാനമന്ത്രി നരേന്ദ്ര മോദിയുടെ പഴയ പോസ്റ്റ് ഓര്‍മിപ്പിച്ചാണ് കോൺഗ്രസ് നേതാക്കള്‍ കേന്ദ്രസര്‍ക്കാരിനെ വിമര്‍ശിച്ചത്. പ്രശ്നബാധിത മേഖലയിൽ നിന്ന് ഇന്ത്യൻ സൈന്യം പിന്മാറുന്നു എന്ന റിപ്പോര്‍ട്ടുകള്‍ക്കിടയാണ് എന്തിനാണ് സ്വന്തം ഭൂപ്രദേശത്തു നിന്ന് ഇന്ത്യ സൈനികരെ പിൻവലിക്കുന്നത് എന്ന മോദിയുടെ പഴയ ചോദ്യം കോൺഗ്രസ് നേതാക്കള്‍ കുത്തിപ്പൊക്കിയത്.

കിഴക്കൻ ലഡാഖിലെ പ്രശ്നബാധിത മേഖലകളിൽ നിന്ന് സൈന്യങ്ങളെ പിൻവലിക്കാമെന്ന് ഇന്ത്യയും ചൈനയും ധാരണയിലെത്തിയിരുന്നു. ഗാൽവൻ താഴ്‍‍വരയിൽ ചൈനീസ് സൈന്യം രണ്ടര കിലോമീറ്ററോളം പിന്നോട്ടു പോയെന്ന റിപ്പോര്‍ട്ടുകള്‍ക്ക് പിന്നാലെയാണ് ഇന്ത്യയും സൈന്യത്തെ പിന്നോട്ടു വലിക്കുന്നതായി സ്ഥിരീകരണമുണ്ടായത്.

Also Read: ശക്തമായ മഴ തുടരും; ഇന്ന് നാല് ജില്ലകളിലും നാളെ എട്ട് ജില്ലകളിലും യെല്ലോ അലേർട്ട്

സമാനമായ വിഷയത്തിൽ 2013ൽ ഗുജറാത്ത് മുഖ്യമന്ത്രിയായിരിക്കേ നരേന്ദ്ര മോദി പങ്കുവെച്ച ട്വീറ്റാണ് കോൺഗ്രസ് നേതാക്കളാണ് രൺദീപ് സുര്‍ജേവാലയും ശശി തരൂരും ആയുധമാക്കിയത്. ചൈന അവരുടെ സൈന്യത്തെ പിൻവലിക്കുന്നു.പക്ഷെ ഇന്ത്യൻ ഭൂപ്രദേശത്തു നിന്ന് ഇന്ത്യൻ സൈന്യം എന്തിനാണ് പിൻമാറുന്നത് എന്നാണ് എനിക്ക് അത്ഭുതം എന്നായിരുന്നു മോദിയുടെ ട്വീറ്റ്. "ബഹുമാനപ്പെട്ട പ്രധാനമന്ത്രീ, താങ്കളുടെ വാക്കുകള്‍ താങ്കള്‍ ഓര്‍ക്കുന്നുണ്ടോ? നമ്മുടെ സ്ഥലത്തു നിന്നു നമ്മുടെ സൈനികരെ എന്തിനാണ് പിൻവലിക്കുന്നത് എന്ന് ഞങ്ങളോട് പറയാമോ രാജ്യം ഇതിന് ഉത്തരം അന്വേഷിക്കുകയാണ്." രൺദീപ് സുര്‍ജേവാല ട്വീറ്റ് ചെയ്തു.


ഇതിനു പിന്നാലെയായിരുന്നു ശശി തരൂരിൻ്റെ ട്വീറ്റ്. ഞാൻ മോദിജിയെ പിന്തുണയ്ക്കുന്നു, പ്രധാനമന്ത്രി ഇതിന് ഉത്തരം നല്‍കണം എന്നായിരുന്നു മോദിയുടെ പഴയ ട്വീറ്റ് പങ്കുവെച്ചു കൊണ്ട് തരൂര്‍ ആവശ്യപ്പെട്ടത്.


Also Read: സൂപ്പര്‍മാര്‍ക്കറ്റും ബാര്‍ബര്‍ ഷോപ്പും സന്ദര്‍ശിച്ച് കൊവിഡ് രോഗി; ആശങ്ക, കടകള്‍ അടപ്പിച്ചു

ജൂൺ 15ന് ഇന്ത്യ - ചൈന സൈനിക സംഘര്‍ഷം നടന്ന ഗാൽവൻ മേഖലയിൽ നിന്ന് ചൈനീസ് സൈന്യം പിന്മാറുകയാണെന്നാണ് റിപ്പോര്‍ട്ടുകള്‍. പട്രോള്‍ പോയിൻ്റ് 14ന് അടുത്തുള്ള ക്യാംപുകള്‍ പൊളിച്ചു മാറ്റിയ ചൈന സൈന്യത്തെ രണ്ട് കിലോമീറ്ററോളം പിന്നോട്ടു മാറ്റിയെന്നാണ് വിവരം. ഹോട്ട് സ്പ്ലിങ്സ്, ഗോഗ്ര മേഖലകളിലും ചൈനീസ് സൈന്യം പിന്നോട്ടു പോയിട്ടുണ്ട്. സമാനമായി, ഇന്ത്യൻ സൈന്യവും ഇത്രയും ദൂരം പിന്നോട്ടു മാറിയതോടെ ഇടയ്ക്ക് സമാധാന മേഖല രൂപപ്പെട്ടിട്ടുണ്ടെന്നാണ് റിപ്പോര്‍ട്ടുകള്‍.