കുംഭമേളയ്ക്കായി നെഹ്രു പ്രതിമ നീക്കി; പ്രതിഷേധവുമായി കോൺഗ്രസ്

അലഹാബാദ്: അലബഹാദിലെ സൽസാൻ ചൗരയിലുണ്ടായിരുന്ന ജവഹര്‍ലാൽ നെഹ്രു പ്രതിമ നീക്കം ചെയ്തതിൽ കോൺഗ്രസിന് പ്രതിഷേധം. അടുത്ത വര്‍ഷം നടക്കാനിരിക്കുന്ന കുംഭമേളയ്ക്ക് മുന്നോടിയായി നഗരം സൗന്ദര്യവത്കരിക്കുന്നതിന്‍റെ ഭാഗമായാണ് പ്രതിമ നീക്കം ചെയ്തതെന്ന് അധികൃതര്‍ അറിയിച്ചു. എന്നാൽ നെഹ്രു പ്രതിമ നിന്നിരുന്ന അതേ റോഡിലുള്ള ആര്‍ എസ് എസ് ആചാര്യൻ ദീൻ ദയാൽ ഉപാധ്യായയുടെ പ്രതിമ നീക്കം ചെയ്തിട്ടില്ലെന്നതും ശ്രദ്ധേയമാണ്.

നെഹ്രു പ്രതിമ നീക്കം ചെയ്തത് രാജ്യത്തിന്‍റെ പ്രഥമ പ്രധാനമന്ത്രിയെ അപമാനിക്കുന്ന നടപടിയാണെന്ന് കോൺഗ്രസ് ആരോപിച്ചു. നടപടിയിൽ പ്രതിഷേധിച്ച് കോൺഗ്രസും സമാജ് വാദി പാര്‍ട്ടിയും പ്രതിഷേധ പ്രകടനം സംഘടിപ്പിച്ചു. പ്രതിമ നീക്കാനെത്തിയ ക്രെയിൻ തടഞ്ഞ പ്രവര്‍ത്തകര്‍ ഉത്തര്‍ പ്രദേശ് മുഖ്യമന്ത്രി യോഗി ആദിത്യനാഥിനെതിരെ മുദ്രാവാക്യം വിളിക്കുകയും ചെയ്തു.

അതേസമയം, നെഹ്രു പ്രതിമ നിന്നിരുന്നത് റോഡിന്‍റെ മധ്യത്തിലായിരുന്നുവെന്നും അത് അടുത്തുള്ള പാര്‍ക്കിലേയ്ക്ക മാറ്റി സ്ഥാപിക്കുമെന്നുമാണ് അധികൃതരുടെ വിശദീകരണം. എന്നാൽ ദീൻ ദയാൽ ഉപാധ്യായയുടെ പ്രതിമ നീക്കം ചെയ്യാത്തത് എന്താണെന്ന പ്രതിഷേധക്കാരുടെ ചോദ്യത്തിന് അധികൃതര്‍ മറുപടി നല്‍കിയിട്ടില്ല.