നാഗാലാൻഡിൽ കോൺഗ്രസ് മതേതര കക്ഷികളെ പിന്തുണയ്ക്കും

കൊഹിമ: നാഗാലാൻഡ് നിയമസഭാ തിരഞ്ഞെടുപ്പിൽ ബിജെപിയെയും സഖ്യകക്ഷികളെയും നേരിടാൻ കോൺഗ്രസ് മതേതര പാര്‍ട്ടികളെ പിന്തുണയ്ക്കും. 60 അംഗ നിയമസഭ സീറ്റുകളിലേയ്ക്കുള്ള തിരഞ്ഞെടുപ്പ് ഫെബ്രുവരി 27നാണ് നടക്കുന്നത്. ഇതിൽ 19 സീറ്റുകളിലേയ്ക്ക് മാത്രമാണ് കോൺഗ്രസ് മത്സരിക്കുന്നത്.

ഹിന്ദുത്വ ചതിക്കുഴികളിൽ മുങ്ങിത്താഴുന്ന ജനങ്ങളെ രക്ഷിക്കാനാണ് മതേതര പാര്‍ട്ടികളെ പിന്തുണയ്ക്കുന്നതെന്നും നാഗാലാൻഡ് ജനതയുടെ സ്വാതന്ത്ര്യവും അവകാശങ്ങളും സംരക്ഷിക്കുന്നതിനാണ് തീരുമാനമെന്നും സംസ്ഥാന കോൺഗ്രസ് നേതൃത്വം വ്യക്തമാക്കി. ബിജെപിയും എൻഡിപിപിയും തമ്മിൽ സഖ്യമുണ്ടാക്കിയത് ഞെട്ടിച്ചെന്നും എൻഡിപിപി ജനങ്ങളുടെ ഭയം മുഖവിലയ്ക്കെടുത്തില്ലെന്നും കോൺഗ്രസ് അഭിപ്രായപ്പെട്ടു.

മൂന്നു തവണ നാഗാലാൻഡ് മുഖ്യമന്ത്രിയായിരുന്ന നെഫു റിയോയുടെ എൻഡിപിപിയുമായാണ് തിരഞ്ഞെടുപ്പിൽ ബിജെപിയുടെ സഖ്യം. ബിജെപി 20 സീറ്റുകളിലും എൻഡിപിപി 40 സീറ്റുകളിലുമാണ് മത്സരിക്കുന്നത്. എൻപിഎഫിന് 48ഉം ബിജെപിയ്ക്ക് നാലും അംഗങ്ങളുള്ള നാഗാലാൻഡ് നിയമസഭയിൽ കോൺഗ്രസ് അംഗങ്ങളില്ല.