ന്യൂഡൽഹി: ഗുജറാത്തിൻ്റെ വികസനത്തെക്കുറിച്ച് പ്രധാനമന്ത്രി മോദി തൻ്റെ പ്രസംഗങ്ങളിൽ പരാമർശിക്കുന്നു പോലുമില്ലെന്ന് കോൺഗ്രസ് ഉപാധ്യക്ഷൻ രാഹുൽ ഗാന്ധി. ഗുജറാത്തിൽ ഒന്നാംഘട്ട തെരഞ്ഞെടുപ്പിൻ്റെ പശ്ചാത്തലത്തിൽ മാധ്യമപ്രവർത്തകരോട് സംസാരിക്കവെയാണ് രാഹുൽ ഗാന്ധി ഇങ്ങനെ പറഞ്ഞത്.
മോദി ഗുജറാത്തിൻ്റെ വികസനത്തെക്കുറിച്ച് പരാമർശിക്കാതെ ഇരിക്കുന്നതിന് എന്താണ് കാരണമെന്ന് അറിയില്ല. കഴിഞ്ഞ 22 വർഷമായി ബി ജെ പി ഭരിക്കുന്ന ഗുജറാത്തിൽ എന്ത് വികസനമാണ് നടന്നിട്ടുള്ളതെന്നും അദ്ദേഹം ചോദിച്ചു.
ആദ്യഘട്ട വോട്ടെടുപ്പിന് തലേന്ന് മാത്രം പ്രകടന പത്രിക പുറത്തിറക്കേണ്ട ഗതികേട് ഉണ്ടായ പാർട്ടിയാണ് ബിജെപി. ഇക്കാര്യം ഓർക്കണമെന്നും അദ്ദേഹം പറഞ്ഞു. വിവിധ ഘട്ടങ്ങളിലായി താൻ പ്രധാനമന്ത്രിയോട് നിരവധി ചോദ്യങ്ങൾ ചോദിച്ചു. എന്നാൽ, അതിനൊന്നും പ്രധാനമന്ത്രിക്ക് മറുപടി ഉണ്ടായിരുന്നില്ലെന്നും രാഹുൽ ഗാന്ധി പറഞ്ഞു.