എന്നെ എതിര്‍ക്കുന്നവര്‍ രാജ്യത്തെ എതിർക്കുന്നവരെന്ന് മോദി

ന്യൂഡല്‍ഹി: അധികാരത്തിൽ നിന്ന് ബിജെപിയെ പുറത്താക്കാനായി തന്നെ എതിർക്കാൻ സഖ്യമുണ്ടാക്കുന്നവർക്കുള്ള താക്കീതുമായി മോദി. കോണ്‍ഗ്രസിന്റെ നേതൃത്വത്തിലുള്ള പ്രതിപക്ഷ സഖ്യത്തിനെതിരെയാണ് പ്രധാനമന്ത്രി ആഞ്ഞടിച്ചത്. തന്നെ എതിര്‍ക്കാനുമായുള്ള കൂട്ടുകെട്ട് രാജ്യത്തെ തന്നെ എതിര്‍ക്കുന്നതാണെന്നാണ് മോദി അഭിപ്രായപ്പെട്ടത്.

കോൺഗ്രസിന് ബിജെപിയുടെ പ്രവർത്തനങ്ങള്‍ തമാശയാണ്. ദളിത് വിഭാഗക്കാര്‍ക്കും പിന്നാക്കക്കാര്‍ക്കുംവേണ്ടി കേന്ദ്രസര്‍ക്കാര്‍ ചെയ്ത പ്രവര്‍ത്തനങ്ങളെല്ലാം കോണ്‍ഗ്രസ് തമാശയായാണ് കാണുന്നത്. പുരോഗതിക്കായുള്ള പ്രവര്‍ത്തനങ്ങളെ നിന്ദ്യമായി കണക്കാക്കുകയും അവയില്‍ തടസ്സങ്ങളുണ്ടാക്കുകയുമാണ് കോണ്‍ഗ്രസ് ചെയ്യുന്നത്. സ്ത്രീകള്‍ക്കുവേണ്ടി ശൗചാലയം നിര്‍മ്മിക്കുന്നത്, ശുചിത്വഭാരതം എന്ന ആശയം, സൗജന്യ എല്‍പിജി കണക്ഷന്‍ തുടങ്ങിയവയെല്ലാം കോണ്‍ഗ്രസിന് തമാശയാണ്. കുടുംബവാഴ്ച്ച നടത്തുന്നവര്‍ക്ക് ഇതെല്ലാം തമാശയായെ കാണാനാവൂ എന്നും അദ്ദേഹം കൂട്ടിച്ചേർത്തു.

അവര്‍ക്ക് കുടുംബമാണ് രാജ്യം. എനിക്കാവട്ടെ രാജ്യമാണ് കുടുംബം,അതുകൊണ്ട് തന്നെ എന്നെ എതിര്‍ക്കുന്നത് രാജ്യത്തെത്തന്നെ എതിര്‍ക്കുന്നതിന് തുല്യമാണ്. രാഷ്ട്രീയം കളിക്കുന്നതിന് ഒരു പരിധിയുണ്ടെന്നും മോദി വ്യക്തമാക്കി. ജനങ്ങളെക്കുറിച്ച ചിന്തയുള്ളവര്‍ക്കേ പുരോഗതിക്കായി പ്രവര്‍ത്തിക്കാന്‍ കഴിയൂ എന്നും കോണ്‍ഗ്രസിനെ പരാമര്‍ശിച്ച്‌ മോദി അഭിപ്രായപ്പെടുകയുണ്ടായി.