വൈദ്യുത പ്രതിസന്ധിക്കു കാരണം വവ്വാൽ; മധ്യപ്രദേശ് സർക്കാരിന്റെ വിചിത്ര വാദം

ഭോപ്പാല്‍: സംസ്ഥാനത്തെ വൈദ്യുത പ്രതിസന്ധിക്കു കാരണം വവ്വാലുകളാണെന്ന വിചിത്ര വാദവുമായി മധ്യപ്രദേശ് സർക്കാർ. പവർ കട്ട് നിരന്തരം ഉണ്ടാകുന്നതിനെത്തുടർന്ന് ജനങ്ങളിൽനിന്നും രൂക്ഷ വിമർശനം ഉയർന്നതിന്റെ പശ്ചാത്തലത്തിലാണ് സർക്കാർ വിശദീകരണവുമായി രംഗത്തെത്തിയിരിക്കുന്നത്.

വൈദ്യുത തടസ്സത്തിനുള്ള പ്രധാന കാരണം വവ്വാലുകളാണെന്ന് ജീവനക്കാർ പറഞ്ഞതായി വകുപ്പ് മന്ത്രി പ്രിയവ്രത്‌ സിങ്ങ് പറഞ്ഞു. വൈദ്യുത കമ്പികളിൽ വവ്വാലുകൾ തൂങ്ങുന്നതുമൂലമാണ് പവർ കട്ട് ഉണ്ടാകുന്നതെന്നാണ് ജീവനക്കാരുടെ വാദം. ഇതോടെയാണ് ജീവനക്കാരുടെ വാദം ഔദ്യോഗിക അറിയിപ്പായി സർക്കാർ പ്രസിദ്ധീകരിച്ചത്.

ശിവരാജ് സിങ് ചൗഹാന്റെ നേതൃത്വത്തിലുള്ള ബിജെപി സർക്കാർ നിലവാരം കുറഞ്ഞ ട്രാൻസ്ഫോമറുകളാണ് സ്ഥാപിച്ചതെന്ന് നേരത്തെ മധ്യപ്രദേശ് സർക്കാർ ആരോപിച്ചിരുന്നു. കമൽനാഥിന്റെ നേതൃത്വത്തിലുള്ള കോൺഗ്രസ് സർക്കാരാണ് ഇപ്പോൾ മധ്യപ്രദേശ് ഭരിക്കുന്നത്.