നോയ്ഡയില്‍ യുവാക്കള്‍ക്ക് നേരെ പോലീസ് വെടിവെപ്പ്

നോയ്ഡ: സ്വകാര്യ ചടങ്ങില്‍ പങ്കെടുത്ത് മടങ്ങിയ യുവാക്കള്‍ക്കുനേരെ പോലീസ് വെടിവെപ്പ്. ഉത്തര്‍പ്രദേശിലെ നോയ്ഡയിലാണ് സംഭവം. പരിക്കേറ്റ രണ്ട് യുവാക്കളില്‍ ഒരാളുടെ നില ഗുരുതരമാണ്. സംഭവത്തില്‍ എസ്.ഐയെ അറസ്റ്റു ചെയ്യുകയും നാല് പോലീസുകാരെ സസ്‌പെന്‍ഡ് ചെയ്തു.

ഗാസിയാബാദിനടുത്തുള്ള ബെര്‍ഹാംപൂരില്‍ ഒരു വിവാഹനിശ്ചയ പരിപാടി കഴിഞ്ഞ് കാറില്‍ മടങ്ങിയ യുവാക്കള്‍ക്കു നേരെയാണ് ആക്രമണമുണ്ടായത്. വ്യാജ ഏറ്റുമുട്ടലാണ് നടന്നതെന്ന് യുവാക്കളുടെ ബന്ധുക്കള്‍ ആരോപിച്ചു. എന്നാല്‍, ഈ വാദം പോലീസ് തള്ളി. വ്യക്തിവിരോധമാണ് സംഭവത്തിന് പിന്നിലെന്നാണ് പോലീസ് ഭാഷ്യം.

സ്ഥാനക്കയറ്റത്തിനു വേണ്ടി പ്രദേശത്തെ യുവാക്കള്‍ക്കുനേരെ വ്യാജ ഏറ്റുമുട്ടലിന് പോലീസ് പദ്ധതിയിട്ടുവെന്നും ജാതിവിളിച്ചാണ് ആക്രമിച്ചതെന്നും പരിക്കേറ്റ് ഗുരുതരാവസ്ഥയില്‍ കഴിയുന്ന ജിതേന്ദ്ര യാദവിന്റെ ബന്ധു വിജേഷ്ണി യാദവ് ആരോപിച്ചു.