ട്രെയിൻ ദുരന്തം: 43 ട്രെയിനുകൾ റദ്ദാക്കി, 38 എണ്ണം വഴിതിരിച്ചുവിട്ടു; കേരളത്തിൽ നിന്നും റദ്ദാക്കിയത് 2 ട്രെയിനുകൾ

ഭുവനേശ്വർ: ഒഡീഷ ട്രെയിൻ ദുരന്തത്തെ തുടർന്ന് രാജ്യവ്യാപകമായി 43 ട്രെയിനുകൾ റദ്ദാക്കി. 38 എണ്ണം വഴിതിരിച്ചുവിടുകയും ചെയ്തു. കേരളത്തിൽ നിന്നുള്ള രണ്ട് ട്രെയിനുകളും റദ്ദാക്കിയവയിൽ ഉൾപ്പെടുന്നുണ്ട്. ഇന്ന് പുറപ്പെടേണ്ടിയിരുന്ന തിരുവനന്തപുരം-ഷാലിമാർ ദ്വൈവാര എക്സ്പ്രസ്, കന്യാകുമാരി ദിബ്രുഗർ വിവേക് എക്സ്പ്രസ് എന്നിവയാണ് കേരളത്തൽ നിന്നും റദ്ദാക്കിയവ.കേരളത്തിലേക്കുള്ള നാല് ട്രെയിനുകൾ വഴിതിരിച്ചുവിടുകയും ചെയ്തു. ദിബ്രുഗർ-കന്യാകുമാരി, ഷാലിമാർ-തിരുവനന്തപുരം, സിൽച്ചർ-തിരുവനന്തപുരം, ജൂൺ 2 ന് പുറപ്പെട്ട പറ്റ്ന- എറണാകുളം എക്സ്പ്രസ് എന്നിവയാണ് വഴിതിരിച്ച് വിട്ടവയിൽ ഉൾപ്പെടുന്നത്. അതേസമയം ചെന്നൈയിൽ നിന്ന് ഭൂവനേശ്വറിലേക്ക് പ്രത്യേക ട്രെയിൻ പ്രഖ്യാപിച്ചിട്ടുണ്ട്. ഇന്ന് വൈകീട്ടാണ് ട്രെയിൻ ചെന്നൈയിൽ നിന്നും പുറപ്പെടുക.

Also Read : രക്ഷപ്പെട്ടവരിൽ നാല് മലയാളികളും; കേട്ടത് വൻ ശബ്ദവും കൂട്ടനിലവിളിയും, മറിഞ്ഞബോഗിയിലൂടെ പാടത്തേക്ക് ചാടിയെന്ന് തൃശൂരുകാർ

ഒഡീഷയിൽ ട്രെയിൻ ദുരന്തത്തിൽ മരിച്ചവരുടെ എണ്ണം 238 ആയി ഉയർന്നു. 900ത്തോളം പേർ വിവിധ ആശുപത്രികളിൽ ചികിത്സയിലാണ്. അപകടത്തിൽ രക്ഷാപ്രവർത്തനം ഇപ്പോഴും പുരോഗമിക്കുകയാണ്. തലകീഴായി മറിഞ്ഞ ഒരു കോച്ച് ഇപ്പോഴാണ് വെട്ടിപ്പൊളിക്കാൻ തുടങ്ങിയത്. ഇതിനുള്ളിൽ മൃതദേഹങ്ങളുണ്ടെന്ന റിപ്പോർട്ടും പുറത്ത് വരുന്നുണ്ട്.

രക്ഷാപ്രവർത്തനം ഊർജ്ജിതമായി നടക്കുന്നുവെന്ന് റെയിൽവേ മന്ത്രി അശ്വനി വൈഷ്ണവും പ്രതികരിച്ചു. മരണസംഖ്യ ഇനിയും ഉയരാൻ സാധ്യതയുണ്ടെന്നാണ് റിപ്പോർട്ട്. അപകടത്തിൽ പെട്ടവർക്ക് എല്ലാ സഹായവും നൽകും. എയിംസ് ആശുപത്രികളിലടക്കം സജ്ജീകരണം ഏർപ്പെടുത്തിയിട്ടുണ്ടെന്നും അദ്ദേഹം പറഞ്ഞു. നിലവിൽ മുഴുവൻ ശ്രദ്ധയും രക്ഷാപ്രവർത്തനത്തിലാണെന്നും അദ്ദേഹം അപകട സ്ഥലം സന്ദർശിച്ച ശേഷം പറഞ്ഞു.

Also Read : 'ഒറ്റ രാത്രികൊണ്ട് ശേഖരിച്ചത് 500 യൂണിറ്റ് രക്തം'; പൊളിക്കാനാകാതെ ഒരു ബോഗി, ആളുകൾ കുടുങ്ങിക്കിടക്കുന്നതായി റിപ്പോർട്ട്

ട്രെയിൻ ഗതാഗതം വേഗത്തിൽ പുന:സ്ഥാപിക്കുമെന്നും റെയിൽവേ മന്ത്രി വ്യക്തമാക്കി. അന്വേഷണത്തെ കുറിച്ച് പറയുന്നത് ഇപ്പോൾ ഉചിതമാകില്ല. അപകടത്തെ കുറിച്ച് വിശദമായ അന്വേഷണം നടക്കുമെന്നും അശ്വിനി വൈഷ്ണവ്.