മഹാരാഷ്‌ട്രയിൽ 27,524 കൊവിഡ് ബാധിതർ; മുംബൈയിൽ സ്ഥിരീകരിച്ചത് 17,512 കേസുകൾ

മുംബൈ: മഹാരാഷ്‌ട്രയിൽ കൊവിഡ് ബാധിതരുടെ എണ്ണം 27,524 ആയി. ഇന്ന് 1,576 പേർക്ക് രോഗം സ്ഥിരീകരിക്കുകയും 49 പേർക്ക് ജീവൻ നഷ്‌ടമാകുകയും ചെയ്‌തുവെന്ന് ആരോഗ്യ മന്ത്രാലയം വ്യക്തമാക്കി. മുംബൈ നഗരത്തിലും രോഗബാധിതരുടെ എണ്ണം വർധിക്കുകയാണ്.

Also Read: തമിഴ്‌നാട്ടിൽ രോഗബാധിതരുടെ എണ്ണം 10,000 കടന്നു

സംസ്ഥാനത്ത് ഇതുവരെ 1,068 പേർക്ക് ജീവൻ നഷ്‌ടമായപ്പോൾ 6,564 പേർ രോഗമുക്തി നേടി. കൊവിഡ് കേസുകൾ വർധിക്കുന്ന മുംബൈയിൽ 933 പുതിയ കേസുകളാണ് റിപ്പോർട്ട് ചെയ്‌തത്. കഴിഞ്ഞ മണിക്കൂറുകളിൽ 24 പേർ മരിച്ചു. നഗരത്തിൽ മാത്രം 17,512 പേർക്ക് കൊവിഡ് സ്ഥിരീകരിച്ചു. 4,658 പേർ രോഗമുക്തി നേടിയതായും അധികൃതർ വ്യക്തമാക്കി.

ഗുജറാത്തിൽ കഴിഞ്ഞ 24 മണിക്കൂറിനിടെ 340 പേർക്ക് കൊവിഡ് സ്ഥിരീകരിച്ചു. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 9,932 ആയി. 606 പേർക്ക് ജീവൻ നഷ്‌ടമായപ്പോൾ 4,035 പേർ രോഗമുക്തി നേടിയതായും അധികൃതർ വ്യക്തമാക്കി. രാജ്യത്തെ കൊവിഡ് കണക്കുകളിൽ ഗുജറാത്തിനെ മറികടന്ന് തമിഴ്‌നാട് രണ്ടാമത് എത്തിച്ചേർന്നു.

Also Read: ഞായറാഴ്‌ച സമ്പൂണ ലോക്ക് ഡൗൺ തുടരും

റെക്കോർഡ് വേഗതയിലാണ് തമിഴ്‌നാട്ടിൽ കൊവിഡ് രോഗികളുടെ എണ്ണം വർധിക്കുന്നത്. ഏറ്റവും പുതിയ കണക്കുകൾ പ്രകാരം സംസ്ഥാനത്തെ കൊവിഡ് രോഗബാധിതരുടെ എണ്ണം 10,000 കടന്നു. ഇന്ന് 385 കേസുകൾ കൂടി റിപ്പോർട്ട് ചെയ്‌തതോടെ സംസ്ഥാനത്തെ രോഗികളുടെ എണ്ണം 10,108 ആയി ഉയർന്നു. ഇന്ന് അഞ്ച് പേർക്ക് ജീവൻ നഷ്‌ടമായി. ആകെ മരണം 71 ആയി. തമിഴ്‌നാട്ടിലെ രോഗബാധിതരുടെ ശതമാനനിരക്ക് ഉയർന്ന തോതിലാണ്. തമിഴ്‌നാട്ടിലെ കൊവിഡ് രോഗികളുടെ 55 ശതമാനവും ചെന്നൈയിൽ നിന്നുള്ളതാണ്. നഗരത്തിലെ രോഗബാധിതരുടെ എണ്ണം 5,000 കടന്നിരുന്നു.