അന്യ സംസ്ഥാനങ്ങളിലുള്ള തൊഴിലാളികളെ തിരികെയെത്തിക്കാൻ യുപി സ‍ർക്കാർ

ലക്നോ: ലോക് ഡൗൺ കാലത്ത് അന്യസംസ്ഥാനങ്ങളിൽ കുടുങ്ങിപ്പോയ തൊഴിലാളികളെ തിരികെയത്തിക്കാൻ ഉത്തർപ്രദേശ് സർക്കാർ. ഇതുമായി ബന്ധപ്പെട്ടുള്ള നടപടികൾ വേഗത്തിലാക്കാൻ ആക്ഷൻ പ്ലാൻ തയ്യാറാക്കാൻ യുപി മുഖ്യമന്ത്രി യോഗി ആദിത്യനാഥ് ഉദ്യോഗസ്ഥർക്ക് നിർദ്ദേശം നൽകി. സംസ്ഥാനത്തെ കൊറോണ പ്രതിരോധ പ്രവർത്തനങ്ങൾ വിലയിരുത്താൻ ചേർന്ന അവലോകന യോഗത്തിലാണ് തീരുമാനം.

"മറ്റ് സംസ്ഥാനങ്ങളിൽ കുടുങ്ങിപ്പോയ തൊഴിലാളികളെ ഉത്തർപ്രദേശ് സർക്കാർ തിരികെയെത്തിക്കും. സംസ്ഥാനത്ത് എത്തിയ ശേഷം പരിശോധനകൾക്ക് ശേഷം അവരെ വീട്ടിലേക്ക് അയക്കും. അവരവരുടെ വീടുകളിൽ ഇവർ 14 ദിവസം ക്വാറൻൈറനിൽ കഴിയേണ്ടതാണ്," മുഖ്യമന്ത്രി യോഗി ആദിത്യനാഥ് പറഞ്ഞു.

Also Read: കൊറോണയെ രാജ്യം അതിജീവിക്കുക തന്നെയാണ്; മുന്നിൽ നിന്ന് നയിച്ച് കേരളം, രോഗമുക്തിയിൽ ദക്ഷിണേന്ത്യയും ഡൽഹിയും മാതൃകയാവുന്നു!!

തൊഴിലാളികൾക്ക് 1000 രൂപയും റേഷനും സഹായമായി നൽകുമെന്നും അദ്ദേഹം വ്യക്തമാക്കി. കേരളത്തിലടക്കം ഉത്തർപ്രദേശിൽ നിന്നുള്ള അതിഥി തൊഴിലാളികളുണ്ട്. സ്വന്തം നാട്ടിലേക്ക് തിരികെ പോവാൻ സാധിക്കുന്നത് ഇവർക്ക് വലിയ ആശ്വാസമാവും. എന്നാൽ ഇവരെ എങ്ങനെ തിരികെയെത്തിക്കും എന്ന കാര്യത്തിൽ ഇപ്പോഴും വ്യക്തതയില്ല. കേന്ദ്ര സർക്കാരിൻെറ കൂടി നിർദ്ദേശങ്ങൾ ലഭിച്ച ശേഷമായിരിക്കും കൂടുതൽ തീരുമാനം എടുക്കുക.