ആശങ്കപ്പെടുത്തി സജീവ കേസുകൾ
രാജ്യത്ത് 37,15,221 സജീവ കേസുകൾ നിലവിലുണ്ടെന്ന് ആരോഗ്യ മന്ത്രാലയം പുറത്തുവിട്ട കണക്കിൽ വ്യക്തമാക്കുന്നു. കഴിഞ്ഞ 24 മണിക്കൂറിനിടെ 3,56,082 പേർ രോഗമുക്തി നേടിയതോടെ രാജ്യത്ത് കൊവിഡ് മുക്തി നേടിയവരുടെ ആകെ എണ്ണം 1,90,27,304 ആയി ഉയർന്നു. കൊവിഡ് പ്രതിരോധ വാക്‌സിൻ വേഗത്തിൽ തുടരുകയാണ്. രാജ്യത്ത് ഇതുവരെ 17,27,10,066 പേർക്ക് വാക്‌സിൻ കുത്തിവെപ്പ് എടുത്തതായി ആരോഗ്യ മന്ത്രാലയം വ്യക്തമാക്കി.
11 കൊവിഡ് രോഗികൾ മരിച്ചു
ഓക്സിജൻ ലഭ്യമാകാതെ വന്നതോടെ ആന്ധ്രാ പ്രദേശിലെ തിരുപ്പതി സര്‍ക്കാര്‍ ആശുപത്രിയിൽ 11 കൊവിഡ് രോഗികൾ മരിച്ചു. റായലസീമയിലെ ഏറ്റവും വലിയ സര്‍ക്കാര്‍ ആശുപത്രികളിലൊന്നായ ശ്രീ വെങ്കടേശ്വര രാമറൈൻ റുയ സര്‍ക്കാര്‍ ആശുപത്രിയിലെ ഐസിയുവിൽ ചികിത്സയിലായിരുന്ന 11 കൊവിഡ് രോഗികളാണ് മരിച്ചത്. ഐസിയുവിൽ ഓക്സിജൻ സഹായത്തോടെ ചികിത്സയിലായിരുന്ന 11 രോഗികള്‍ മരിച്ചെന്നും മറ്റു രോഗികളുടെ ജീവൻ രക്ഷിക്കാനായെന്നും ജില്ലാ കളക്ടര്‍ എം ഹരി നാരായണ പറഞ്ഞു. ആശുപത്രിയിൽ ഓക്സിജൻ തീര്‍ന്ന സംഭവത്തെപ്പറ്റി അന്വേഷിക്കാൻ സര്‍ക്കാര്‍ നിര്‍ദേശം നല്‍കിയിട്ടുണ്ട്.
3,876 പേർക്ക് കൂടി ജീവൻ നഷ്‌ടം
ദിനം പ്രതിയുള്ള കൊവിഡ് കേസുകളിൽ വർധന തുടരുന്നതിനിടെ കഴിഞ്ഞ 24 മണിക്കൂറിനിടെ 3,876 പേർ കൊവിഡ് ബാധിച്ച് മരിച്ചു. ഇതോടെ രാജ്യത്തെ ആകെ കൊവിഡ് മരണം 2,49,992 ആയി ഉയർന്നു. മരണസംഖ്യ ഉയരുന്നത് പ്രതിരോധ പ്രവർത്തനങ്ങൾക്ക് തിരിച്ചടിയാകുകയാണ്. കൊവിഡ് കേസുകളിൽ വർധന തുടരുന്ന സാഹചര്യത്തിൽ ഡൽഹിയടക്കമുള്ള സംസ്ഥാനങ്ങൾ നിയന്ത്രണം കൂടുതൽ ശക്തമാക്കി.
രാജ്യത്തെ പുതിയ കൊവിഡ് കേസുകൾ
കൊവിഡ് വ്യാപനം രൂക്ഷമായി തുടരുന്നതിനിടെ കഴിഞ്ഞ 24 മണിക്കൂറിനിടെ രാജ്യത്ത് 3,29,942 പുതിയ കൊവിഡ് കേസുകൾ റിപ്പോർട്ട് ചെയ്‌തു. ഇതോടെ രാജ്യത്തെ ആകെ കൊവിഡ് കേസുകളുടെ എണ്ണം 2,29,92,517 ആയി ഉയർന്നെന്ന് കേന്ദ്ര ആരോഗ്യ മന്ത്രാലയം പുറത്തുവിട്ട കണക്കിൽ വ്യക്തമാക്കുന്നു. കഴിഞ്ഞ ആഴ്‌ചയുമായി താരതമ്യം ചെയ്യുമ്പോൾ കൊവിഡ് കേസുകളിൽ നേരിയ കുറവുണ്ട്. കഴിഞ്ഞ ആഴ്‌ചകളിൽ നാല് ലക്ഷത്തിന് മുകളിലായിരുന്നു ദിനം പ്രതിയുള്ള കൊവിഡ് കേസ്.