നാല് ലക്ഷം കടന്ന് മഹാരാഷ്‌ട്രയിലെ കൊവിഡ് കേസുകൾ; തമിഴ്‌നാട്ടില്‍ 6,426 പുതിയ രോഗികളും 82 മരണവും

മുംബൈ: രാജ്യത്ത് ഏറ്റവും കൂടുതൽ കൊവിഡ് കേസുകൾ നിലവിലുള്ള മഹാരാഷ്‌ട്ര, തമിഴ്‌നാട് സംസ്ഥാനങ്ങളിൽ രോഗബാധിതരുടെ എണ്ണം കുതിക്കുന്നു. മഹാരാഷ്‌ട്രയിൽ ഇന്ന് 9,211 കൊവിഡ് കേസുകൾ കൂടി റിപ്പോർട്ട് ചെയ്‌തതോടെ സംസ്ഥാനത്തെ ആകെ രോഗബാധിതരുടെ എണ്ണം 4,00,651 ആയി. തമിഴ്‌നാട്ടിലെ രോഗബാധിതരുടെ എണ്ണം 2,34,114 ആയി ഉയർന്നു.

Also Read: 19 പുതിയ ഇടങ്ങൾ പട്ടികയിൽ, 13 പ്രദേശങ്ങളെ ഒഴിവാക്കി; ഹോട്ട് സ്‌പോട്ട് വിവരങ്ങൾ

മഹാരാഷ്‌ട്രയിൽ ഇന്ന് 298 കൊവിഡ് മരണങ്ങൾ റിപ്പോർട്ട് ചെയ്‌തതോടെ മരണസംഖ്യ 14,463 ആയി. രോഗമുക്തി നേടിയവരുടെ എണ്ണം വർധിച്ചത് ആശ്വാസം പകരുന്നുണ്ട്. ഇന്ന് 7,478 പേർ രോഗമുക്തി നേടിയതോടെ ആശുപത്രി വിട്ടവരുടെ എണ്ണം 2,39,755 ആയി. 59.84 ശതമാനമാണ് സംസ്ഥാനത്തെ രോഗമുക്തി നിരക്കെന്ന് അധികൃതർ അറിയിച്ചു.

തമിഴ്‌നാട്ടിൽ കൊവിഡ് ബാധിതരുടെ എണ്ണത്തിൽ കുതിപ്പ് തുടരുകയാണ്. കഴിഞ്ഞ 24 മണിക്കൂറിനുള്ളിൽ 82 മരണവും 6,426 പുതിയ കേസുകളുമാണ് സംസ്ഥാനത്ത് റിപ്പോർട്ട് ചെയ്‌തത്. ഇതോടെ ആകെ രോഗബാധിതരുടെ എണ്ണം 2,34,114 ആയി ഉയർന്നു. ഇതുവരെ 3,741 പേർക്കാണ് ജീവൻ നഷ്‌ടമായത്. 1,72,838 പേർക്ക് ഇതുവരെ രോഗമുക്തി ലഭിച്ചു. ഇന്ന് മാത്രം 5927 പേർ ആശുപത്രി വിട്ടു. സംസ്ഥാനത്തെ വിവിധ ആശുപത്രികളിലായി 57,490 പേരാണ് ചികിത്സയിൽ തുടരുന്നത്. ഇതുവരെ 25,36,660 പേരുടെ സാമ്പിളുകൾ പരിശോധിച്ചെന്നും ആരോഗ്യവകുപ്പ് അറിയിച്ചു.

Also Read: പിടിക്കപ്പെട്ടാൽ പോക്കറ്റ് കാലിയാകും; കൊവിഡ് ചട്ടലംഘനത്തിന് സ്പോട്ടില്‍ പിഴ, 200 രൂപ മുതൽ 2000വരെ

രാജ്യതലസ്ഥാനമായ ഡൽഹിയിലും കൊവിഡ് ബാധിതരുടെ എണ്ണത്തിൽ വർധനയുണ്ട്. കഴിഞ്ഞ 24 മണിക്കൂറിനിടെ 1,035 കൊവിഡ് കേസുകളും 26 മരണവും സംസ്ഥാനത്ത് റിപ്പോർട്ട് ചെയ്‌തു. ഇതോടെ ആകെ രോഗികളുടെ എണ്ണം 1,33,310 ആയി. ആകെ മരണം 3,907 ആയി ഉയർന്നു.

കേരളത്തിൽ ഇന്ന് 903 പേർക്ക് കൊവിഡ് സ്ഥിരീകരിച്ചപ്പോൾ 641 പേർക്ക് രോഗമുക്തിയുണ്ടായി. 706 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. മലപ്പുറം സ്വദേശിയുടെ ഒരു കൊവിഡ് മരണം കൂടി സർക്കാർ സ്ഥിരീകരിച്ചു. തിരുവനന്തപുരം (213) ജില്ലയിലാണ് ഈ കണക്ക് ഉയർന്ന തോതിലുള്ളത്.