ഇന്ത്യയിൽ കൊവിഡ് വാക്സിൻ സൗജന്യം; ജൂലൈക്ക് മുൻപ് 27 കോടി പേർക്ക് വാക്സിനെടുക്കാം

ന്യൂഡല്‍ഹി: ഇന്ത്യയില്‍ എല്ലായിടത്തും കൊവിഡ്-19 വാക്സിന്‍ സൗജന്യമായാണ് നല്‍കുന്നതെന്ന് കേന്ദ്ര ആരോഗ്യവകുപ്പ് മന്ത്രി ഡോ. ഹര്‍ഷ് വര്‍ധന്‍. മാധ്യമപ്രവര്‍ത്തകരുടെ ചോദ്യത്തിന് ഉത്തരമായാണ് മന്ത്രിയുടെ മറുപടി. ഡ‍ല്‍ഹിയിലെ ജിടിബി ആശുപത്രിയില്‍ കൊവിഡ് വാക്സിന്‍ ഡ്രൈ റണ്‍ പരിപാടിയില്‍ പങ്കെടുക്കാന്‍ എത്തി മടങ്ങുമ്പോഴാണ് മന്ത്രിയുടെ പ്രതികരണം.

ആദ്യഘട്ടത്തില്‍ സൗജന്യ കൊവിഡ് വാക്സിന്‍ നല്‍കുന്നത് 3 കോടി ആളുകള്‍ക്കാണ്. ഇതില്‍ ഒരുകോടി ആരോഗ്യപ്രവര്‍ത്തകരും രണ്ടുകോടി കൊവിഡ് പ്രതിരോധപ്രവര്‍ത്തകരുമാണ് ഉണ്ടാകുക. ഇതിന് ശേഷം 27 കോടി ആളുകള്‍ക്ക് വാക്സിന്‍ നല്‍കാനാണ് സര്‍ക്കാര്‍ ഉദ്ദേശിക്കുന്നത്. ജൂലൈ മാസത്തിനുള്ളില്‍ ഇത് പൂര്‍ത്തിയാക്കും. ഇതിന്‍റെ വിശദാംശങ്ങള്‍ വ്യക്തമാക്കാറായിട്ടില്ലെന്നും ഹര്‍ഷ് വര്‍ധന്‍ വിവരിച്ചു.

കൊവിഡ് വാക്സിന്‍ സൗജന്യമായി നല്‍കുമെന്ന് ഡല്‍ഹി ആരോഗ്യമന്ത്രി സത്യേന്ദര്‍ ജെയിൻ ഇന്ന് രാവിലെ വ്യക്തമാക്കിയിരുന്നു. ഇതിന് പിന്നാലെയാണ് കേന്ദ്ര ആരോഗ്യമന്ത്രിയുടെയും പ്രതികരണം

ബിഹാര്‍ തെരഞ്ഞെടുപ്പിന് മുന്‍പ് സംസ്ഥാനത്ത് കൊവിഡ് വാക്സിന്‍ സൗജന്യമായി നല്‍കുമെന്ന് ബിജെപി അവകാശവാദം ഉന്നയിച്ചിരുന്നു. ഇതിന് എതിരെ മാധ്യമപ്രവര്‍ത്തകന്‍ സാകേത് ഗോഖലെ, തെരഞ്ഞെടുപ്പ് കമ്മീഷന് പരാതി നല്‍കി. എന്നാല്‍ ബിജെപിയുടെ പ്രഖ്യാപനം തെരഞ്ഞെടുപ്പ് ചട്ടങ്ങളുടെ ലംഘനമല്ലെന്നായിരുന്നു തെരഞ്ഞെടുപ്പ് കമ്മീഷന്‍ നല്‍കിയ മറുപടി.

കേരള മുഖ്യമന്ത്രി പിണറായി വിജയനും വാക്സിന്‍ സൗജന്യമായാണ് വിതരണം ചെയ്യുന്നതെന്ന് നേരത്തെ മാധ്യമങ്ങളോട് പറഞ്ഞിരുന്നു. വാക്സിന്‍ വിതരണത്തെക്കുറിച്ച് മുഴുവന്‍ ചിത്രം ലഭിച്ചിട്ടില്ല, എന്തായാലും വാക്സിന് എന്തെങ്കിലും തരത്തിലുള്ള ചാര്‍ജ് ഈടാക്കാന്‍ ഉദ്ദേശിക്കുന്നില്ലെന്നായിരുന്നു പിണറായി വിജയന്‍റെ ഒരു വാര്‍ത്താ സമ്മേളനത്തിലെ മറുപടി.

ഒന്നിലധികം വാക്സിനുകള്‍ ഇന്ത്യയില്‍ പരീക്ഷണത്തിന് അനുമതി തേടിയിട്ടുണ്ട്. അടിയന്തര ഉപയോഗത്തിന് ഓക്സ്ഫഡ് - ആസ്ട്രസെനേക്ക വാക്സിന് അനുമതിയായിട്ടുണ്ട്. കൊവിഷീല്‍ഡ് എന്ന പേരില്‍ ഇന്ത്യന്‍ കമ്പനി സെറം ഇൻസ്റ്റിറ്റ്യൂട്ട് സഹകരിച്ചാണ് ഇത് പുറത്തിറക്കിയിട്ടുള്ളത്.