ബിനോയിക്കെതിരായ ആരോപണം; പാർട്ടി അംഗമല്ലാത്തയാളുടെ കാര്യത്തിൽ ഇടപെടില്ലെന്ന് യെച്ചൂരി

ന്യൂഡൽഹി: ബിനോയ് കോടിയേരിക്കെതിരായ ലൈംഗിക പീഡന ആരോപണം വ്യക്തിപരമായി വിഷയമെന്ന് സിപിഎം ജനറൽ സെക്രട്ടറി സീതാറാം യെച്ചൂരി. പാർട്ടി അംഗമല്ലാത്ത ആളുടെ കാര്യത്തിൽ ഇടപെടില്ലെന്ന് അദ്ദേഹം വ്യക്തമാക്കി.

സിപിഎം സംസ്ഥാന സെക്രട്ടറി ഇക്കാര്യത്തിലെടുത്ത നിലപാട് വ്യക്തമാണെന്ന് അദ്ദേഹം പറഞ്ഞു. എന്നാൽ, പാർട്ടിക്ക് യുവതി പരാതി നൽകിയ കാര്യത്തിൽ യെച്ചൂരി പ്രതികരിച്ചില്ല.

ബിനോയിക്കെതിരായ പരാതിയിൽ പാർട്ടി ഇടപെടില്ലെന്ന് കോടിയേരി ബാലകൃഷ്ണൻ പറഞ്ഞിരുന്നു. ബിനോയിക്കെതിരായി മുംബൈ പോലീസ് സ്റ്റേഷനിൽ നൽകിയ പരാതി പരിശോധിച്ച് അതിന്റെ നിജസ്ഥിതി നിയമപരമായി കണ്ടെത്തേണ്ടതാണെന്നും ആരോപണവിധേയനായ വ്യക്തിയെ സഹായിക്കുന്നതിനോ സംരക്ഷിക്കുന്നതിനോ ഉള്ള നടപടി താനോ പാർട്ടിയോ സ്വീകരിക്കില്ലെന്നും കോടിയേരി പറഞ്ഞു.