ജമ്മുവില്‍ കര്‍ഫ്യൂ; അമര്‍നാഥ് യാത്ര മാറ്റിവച്ചു

ശ്രീനഗർ: ജമ്മു പോലീസും രാഷ്ട്രീയ റൈഫിൾസും തമ്മിലുണ്ടായ വെടിവെപ്പിൽ ഹിസ്‌ബുൾ മുജാഹിദീൻ കമാന്‍ഡര്‍ ബുർഹാൻ മുസഫർ വാനി കൊല്ലപ്പെട്ടതിനെ തുടർന്നു പുൽവാമ ജില്ലയിലും മറ്റു ചില ഭാഗങ്ങളിലും കർഫ്യു പ്രഖ്യാപിച്ചു. മൊബൈൽ ഇന്‍റര്‍നെറ്റ് ബന്ധങ്ങൾക്കും നിയന്ത്രണം ഏർപ്പെടുത്തിയിട്ടുണ്ട്.

നഗരത്തിൽ ക്രമസമാധാനം ഉറപ്പാക്കാനായി കർശന നടപടികൾ കൈക്കൊണ്ടിട്ടുണ്ട്. മുന്‍കരുതലിന്‍റെ ഭാഗമായി ട്രെയിൻ സര്‍വീസുകൾക്കും നിയന്ത്രണം ഏർപ്പെടുത്തി.

അമർനാഥ് യാത്ര താല്‍കാലികമായി നിർത്തിവച്ചു. ബുർഹാൻ കൊല്ലപ്പെട്ടതിനെതിരെ പ്രതിഷേധം സംഘടിപ്പിക്കാതിരിക്കാൻ പല ഹൂറിയത്ത് നേതാക്കളെയും വീട്ടു തടങ്കലിൽ പാർപ്പിച്ചിരിക്കുകയാണ്.

21കാരനായ ബുർഹാൻ നിരവധി യുവാക്കളെ തീവ്രവാദത്തിലേക്കു നയിച്ചിരുന്നതായി തെളിഞ്ഞിരുന്നു. തീവ്രവാദം പ്രചിരിപ്പിക്കുന്നതിനു വേണ്ടിയുള്ള പ്രവർത്തനങ്ങളും ബുർഹാൻ നടത്തിയിരുന്നു. വിവാദ പ്രാസംഗികനായ സക്കീർ നായികിന് ട്വിറ്ററിലൂടെ പിന്തുണ പ്രഖ്യാപിച്ചതിനു തൊട്ടു പിന്നാലെ ആയിരുന്നു ബുർഹാന്‍റെ അന്ത്യവും സംഭവിച്ചത്.