ധാഭോൽക്കർ വധം: ഗൗരി ലങ്കേഷ് വധക്കേസ് പ്രതി കസ്റ്റഡിയിൽ

മുംബൈ: യുക്തിവാദി നേതാവ് നരേന്ദ്ര ധാഭോൽക്കറിനെ കൊലപ്പെടുത്തിയ കേസിൽ മാധ്യമപ്രവർത്തക ഗൗരി ലങ്കേഷ് വധക്കേസിലെ പ്രതി അമോൽ കാലെയെ സിബിഐ കസ്റ്റഡിയിലെടുത്തു. ബെംഗളൂരുവിലെ ജയിലിൽ കഴിയുകയായിരുന്ന അമോൽ കാലെയെ കൂടുതൽ ചോദ്യം ചെയ്യുന്നതിനാണ് സിബിഎെ കസ്റ്റഡിയിലെടുത്തത്.

കഴിഞ്ഞ മേയിലാണ് അമോല്‍ കാലെ ഗൗരിവധക്കേസില്‍ അറസ്റ്റിലായത്. ഗൗരി ലങ്കേഷ് വധക്കേസിൽ അറസ്റ്റു ചെയ്തു ചോദ്യം ചെയ്തപ്പോഴാണ് ധാഭോൽക്കർ വധക്കേസിലെ ഇയാളുടെ പങ്ക് തെളിഞ്ഞതെന്ന് അന്വേഷണ ഉദ്യോഗസ്ഥര്‍ പറഞ്ഞു. അമോൽ കാലെയും കേസിലെ മുഖ്യപ്രതിയായ സച്ചിൻ പ്രകാശ്‌റാവു അൻഡുറെയും ഔറംഗാബാദിൽ കണ്ടുമുട്ടുകയും സമീപമുള്ള ലോഡ്ജില്‍ താമസിക്കുകയും ചെയ്കിരുന്നു.

അവിടെവച്ചാണ് സച്ചിന് അമോൽ കാലെ തോക്ക് കൈമാറിയതെന്നു സിബിഐ അധികൃതർ അറിയിച്ചു. ധാഭോല്‍ക്കറിന്‍റെയും ഗൗരി ലങ്കേഷിന്‍റെയും കൊലപാതകത്തിനു പിന്നില്‍ ഒരേ സംഘമാണെന്ന് അന്വേഷണ ഉദ്യോഗസ്ഥര്‍ നേരത്തേ കണ്ടെത്തിയിരുന്നു.