മുംബൈയിലെ അനന്തരവന്‍റെ വിവാഹം ദാവൂദ് സ്കൈപ്പിലൂടെ കാണും

മുംബൈ: മുംബൈയിൽ ബുധനാഴ്ച നടക്കുന്ന തന്‍റെ ബന്ധുവിന്‍റെ വിവാഹത്തില്‍ പാക്കിസ്ഥാനിൽ കഴിയുന്ന അധോലോക കുറ്റവാളി ദാവൂദ് ഇബ്രാഹിം സ്കൈപ്പിലൂടെ പങ്കെടുക്കുമെന്ന് റിപ്പോർട്ട്. മുംബൈയിലെ വിവാഹ വേദിയിൽ ഇതിനുള്ള സൗകര്യങ്ങൾ ഒരുക്കി കഴിഞ്ഞതായി മാധ്യമങ്ങള്‍ റിപ്പോര്‍ട്ട് ചെയ്യുന്നു.

ദാവൂദിന്‍റെ സഹോദരി ഹസീന പർകറിന്‍റെ ഇളയ മകന്‍റെ വിവാഹമാണ് നാളെ മുംബൈയില്‍ നടക്കുന്നത്. റസൂൽ പള്ളിയാണ് വിവാഹവേദി. വൈകിട്ട് മുംബൈയിലെ ആഡംബര ഹോട്ടലിൽ വിരുന്നു സൽക്കാരവും നടക്കും. ഇതിനെല്ലാം നേതൃത്വം നൽകാൻ മുംബൈയിലുളഅള ദാവൂദിന്‍റെ സഹായിയെ ചുമതലപ്പെടുത്തിയിട്ടുണ്ട്. ദാവൂദിന്‍റെ സഹോദരൻ ഇക്ബാൽ കസ്കർ, സഹോദരിമാരായ സെയ്റ്റൂൺ, ഫർസാന തുടങ്ങിയവരും വിവാഹത്തിൽ പങ്കെടുക്കും.

വിരുന്നിലെ അതിഥികളെ സൂക്ഷ്മമായി നിരീക്ഷിക്കാൻ മുംബൈ ക്രൈം ബ്രാഞ്ച് ഉദ്യോഗസ്ഥര്‍ക്ക് നിർദേശം നൽകിയിട്ടുണ്ട്. ചടങ്ങ് അസ്വസ്ഥമാക്കാന്‍ ദാവൂദിന്‍റെ എതിരാളികൾ ശ്രമിച്ചേക്കുമെന്ന സൂചനയെ തുടർന്നാണിതെന്നും മുതിർന്ന ഉദ്യോഗസ്ഥൻ പറഞ്ഞു.