രാജ്യത്ത് ഓക്സ്ഫഡ് കൊവിഡ് വാക്സിൻ പരീക്ഷണം വീണ്ടും തുടങ്ങാൻ ഡിസിജിഐ അനുമതി

ന്യൂഡൽഹി: രാജ്യത്ത് ഓക്സ്ഫഡ് കൊവിഡ് വാക്സിൻ പരീക്ഷണം പുനഃരാരംഭിക്കാൻ സിറം ഇൻസ്റ്റിറ്റ്യൂട്ടിന് ഡിസിജിഐ അനുമതി. നേരത്തെ മരുന്ന് പരീക്ഷിച്ചയാൾക്ക് 'അജ്ഞാത അസുഖം' കണ്ടെത്തിയെന്ന റിപ്പോർട്ടിനെത്തുടർന്ന് നിർത്തിവെച്ച ഓക്സ്ഫഡ്- അസ്ട്രാസെനെകയുടെ രാജ്യത്തെ പരീക്ഷണം പുനഃരാരംഭിക്കാനാണ് അനുമതി ലഭിച്ചിരിക്കുന്നതെന്ന് വാർത്താ ഏജൻസിയായ എഎൻഐയാണ് റിപ്പോർട്ട് ചെയ്തിരിക്കുന്നത്.

പരീക്ഷണം വീണ്ടും തുടങ്ങുമ്പോൾ കൂടുതൽ നിബന്ധനകളും ഡിസിജിഐ മുന്നോട്ട് വെച്ചിട്ടുണ്ട്. പരീക്ഷണ സമയത്ത് കൂടുതൽ ജാഗ്രത വേണം, പഠനത്തിന്‍റെ തുടർന നടപടികളിലെ പ്രതികൂല സംഭവങ്ങൾ സൂക്ഷ്മമായി നിരീക്ഷിക്കുക തുടങ്ങിയ നിർദേശങ്ങളാണ് ഡിസിജിഐ മുന്നോട്ട് വെച്ചിരിക്കുന്നതെന്നാണ് റിപ്പോർട്ട്.

Also Read: മഹാരാഷ്‌ട്രയിൽ 20,482 പുതിയ കൊവിഡ് കേസുകൾ; കർണാടകയിൽ 7,576 രോഗബാധിതർ കൂടി

നേരത്തെ മരുന്ന് പരീക്ഷിച്ചയാൾക്ക് പാർശ്വഫലങ്ങൾ കണ്ടെന്ന റിപ്പോർട്ടിനെത്തുടർന്ന് നിർത്തിവെച്ച മരുന്ന് പരീക്ഷണം ഓക്സ്ഫഡ് യൂണിവേഴ്സിറ്റി കഴിഞ്ഞ ശനിയാഴ്ചയാണ് പുനഃരാരംഭിച്ചത്. ഡിസിജിഐയുടെ അനുമതി ലഭിച്ചാലുടൻ തങ്ങളും പരീക്ഷണം ആരംഭിക്കുമെന്ന് ഇന്ത്യയിലെ വാക്സിൻ പരീക്ഷണത്തോട് സഹകരിക്കുന്ന പൂനെ സിറം ഇൻസ്റ്റിറ്റ്യൂട്ട് വ്യക്തമാക്കിയിരുന്നു.

ബ്രിട്ടനിലെ മെഡിസിൻസ് ഹെൽത്ത് റെഗുലേറ്ററി അതോറിറ്റിയാണ് അൾട്രാ സെനകെയ്ക്ക് മരുന്ന് പരീക്ഷണം പുനഃരാരംഭിക്കാൻ അനുമതി നല്‍കിയത്. ഇതോടെയാണ് AZD1222 എന്ന വാക്സിൻ പരീക്ഷണം വീണ്ടും ചർച്ചയാകുന്നത്. ജൂലായ് 20നാണ് ഓക്സ്ഫഡ് സര്‍വകലാശാല കൊവിഡ്-19 വാക്സിന്‍ വികസിപ്പിച്ചെടുത്തത്. ഇന്ത്യയിലെ സിറം ഇൻസ്റ്റിറ്റ്യൂട്ട് ഉൾപ്പെടെ വിവിധ രാജ്യങ്ങളിലെ സ്ഥാപനങ്ങളാണ് പരീക്ഷണത്തോട് സഹകരിച്ച് വരുന്നത്.

Also Read: ഓക്സ്ഫഡ് കൊവിഡ് വാക്സിൻ പരീക്ഷണം പുനഃരാരംഭിച്ചു

ഈ വർഷം അവസാനത്തോടെയോ, അല്ലെങ്കിൽ അടുത്തവർഷം ആദ്യമോ ഓക്സ്ഫഡ് വാക്സിൻ വിപണിയിലെത്തുമെന്നായിരുന്നു നേരത്തെ പുറത്തുവന്ന റിപ്പോർട്ടുകൾ. ഇതിനിടയിലാണ് കുത്തിവെപ്പ് സ്വീകരിച്ചയൊരാൾക്ക് അജ്ഞാത അസുഖം കണ്ടെത്തിയതും പരീക്ഷണം താൽക്കാലികമായി നിർത്തിവെച്ചതും. വാക്സിൻ പരീക്ഷണം പുനഃരാരംഭിച്ചെന്ന വാർത്തകൾ പ്രതിദിന കൊവിഡ് കേസുകൾ ഉയരുന്ന സാഹചര്യത്തിൽ ലോകരാജ്യങ്ങൾക്ക് പ്രതീക്ഷയേകുന്നതാണ്.