തിക്കിലും തിരക്കിലും മരിച്ചവരുടെ എണ്ണം നാലായി

ചെന്നൈ: തമിഴ്‌നാട് മുൻ മുഖ്യമന്ത്രി എം.കരുണാനിധിയുടെ സംസ്‌കാര ചടങ്ങിനിടെയുണ്ടായ തിക്കിലും തിരക്കിലുംപെട്ട് മരിച്ചവരുടെ എണ്ണം നാലായി. ഇന്നലെ മൂന്ന് പേർ മരിക്കുകയും ഗുരുതരമായി പരിക്കേറ്റവരെ ആശുപത്രിയിൽ പ്രവേശിപ്പിക്കുകയും ചെയ്തിരുന്നു. ചികിത്സയിലായിരുന്ന ഒരാളാണ് ഇന്നലെ രാത്രി വൈകി മരിച്ചത്. മരിച്ച നാലു പേരിൽ ഒരാളെ ഇത് വരെ തിരിച്ചറിഞ്ഞിട്ടില്ല.

22 പേരെ പരിക്കേറ്റ നിലയിൽ ആശുപത്രിയിൽ പ്രവേശിപ്പിച്ചിട്ടുണ്ട്.അതിൽ രണ്ടു പേരുടെ നില ഗുരുതരമായി തുടരുകയാണ്. അതെ സമയം, മറീന ബീച്ചിലെ കരുണാനിധിയുടെ സമാധിയിൽ മകനും പ്രതിപക്ഷ നേതാവുമായ എം.കെ.സ്റ്റാലിൻ ഇന്ന് രാവിലെ പുഷ്‌പാർച്ചന നടത്തി. ഇന്നലെ രാത്രി വൈകിയും സമാധിയിലേക്ക് സന്ദർശകരുടെ പ്രവാഹമായിരുന്നു. തമിഴ്‌നാട്ടിൽ ഇന്ന് ഔദ്യോഗികമായി അവധി പ്രഖ്യാപിച്ചിട്ടില്ലെങ്കിലും സ്‌കൂളുകൾ മിക്കതും തുറന്നിട്ടില്ല. സംസ്ഥാനത്ത് ഒരാഴ്‌ചത്തെ ദുഖാചാരണത്തിന് സർക്കാർ ഉത്തരവിട്ടിരിക്കുകയാണ്.