ഡൽഹി മാക്‌സ് ആശുപത്രിയുടെ ലൈസൻസ് റദ്ദാക്കി

ന്യൂഡൽഹി: ഡൽഹി ഷാലിമാർബാഗിലെ മാക്‌സ് ആശുപത്രിയുടെ ലൈസൻസ് റദ്ദാക്കി. നവജാത ശിശു മരിച്ചെന്ന് ആശുപത്രി വിധിയെഴുതിയതിനെ തുടർന്നാണ് ഡൽഹി സർക്കാർ ലൈസൻസ് റദ്ദാക്കിയത്. വിദഗ്‌ധ അമിതിയുടെ അന്വേഷണത്തിൽ ആശുപത്രിക്ക് വീഴ്‌ച സംഭവിച്ചെന്ന് കണ്ടെത്തിയാൽ നടപടിയെടുക്കുമെന്ന് നേരത്തെ ആരോഗ്യമന്ത്രി സത്യേന്ദർ ജെയിൻ അറിയിച്ചിരുന്നു.

നവമ്പർ 30 ന് ആശുപത്രിയിൽ ജനിച്ച ഇരട്ടക്കുട്ടികൾ മരിച്ചെന്നായിരുന്നു ആശുപത്രി അധികൃതർ രക്ഷകർത്താക്കളെ അറിയിച്ചത്. കുട്ടികളുടെ മൃതദേഹങ്ങൾ പ്ലാസ്റ്റിക് ബാഗുകളിലാക്കി നൽകുകയും ചെയ്തു. എന്നാൽ സംസ്കാര ചടങ്ങുകൾ തുടങ്ങാനിരിക്കെയാണ് ഒരു കുഞ്ഞിന് ജീവനുണ്ടെന്ന് കണ്ടെത്തിയത്. എന്നാൽ, ചികിത്സയിലിരിക്കെ പിന്നീട് കുട്ടി മരിച്ചു. കുട്ടികളുടെ പിതാവ് മാക്‌സ് ആശുപത്രിക്കെതിരെ 50 ലക്ഷം രൂപ ചികിത്സ ഫീസ് ഈടാക്കിയെന്ന് ആരോപിച്ചും പരാതി നൽകിയിരുന്നു. ആശുപത്രിക്കെതിരെ വലിയ പ്രതിഷേധമാണ് നടന്നത്.