ശമ്പളം നൽകിയില്ല; ഫാഷൻ ഡിസൈനറെ കുത്തിക്കൊന്നു

ന്യൂഡല്‍ഹി: പ്രമുഖ ഫാഷന്‍ ഡിസൈനറെ വീടിനുള്ളിൽ കൊല്ലപ്പെട്ട നിലയിൽ കണ്ടെത്തി. ഇവരുടെ വേലക്കാരനും വീടിനുള്ളിൽ തന്നെ മറ്റൊരിടത്തായി മരിച്ച് കിടക്കുന്ന നിലയിലായിരുന്നു. സൗത്ത് ഡല്‍ഹിയിലെ വസന്ത് കുഞ്ചിലാണ് സംഭവം. പ്രമുഖ വനിതാ ഫാഷന്‍ ഡിസൈനറായ മാല ലഖാനി (53)നിയേയും വേലക്കാരന്‍ ബഹാദൂറി(50)നെയുമാണ് വ്യാഴാഴ്ച പുലര്‍ച്ചെ കൊല്ലപ്പെട്ട നിലയില്‍ കണ്ടെത്തിയത്.

മോഷണശ്രമത്തിനിടെയാണ് കൊലപാതകം നടന്നതെന്നായിരുന്നു പോലീസിന്‍റെ പ്രാഥമിക നിഗമനം. പക്ഷേ മാലയുടെ സ്ഥാപനത്തിലെ ജീവനക്കാരെ ചോദ്യം ചെയ്തതോടെ കുറച്ച് മാസങ്ങളായി തങ്ങള്‍ക്ക് ശമ്പളം നൽകാത്തതിനാലാണ് മാലയെ കൊലപ്പെടുത്തി വീട് കൊള്ളയടിച്ചതെന്ന് അവർ സമ്മതിച്ചു. മാര്‍ക്കറ്റിൽ നിന്ന് ഇതിനായി പ്രത്യേകം കത്തി വാങ്ങി കുറച്ച് ദിവസം മുമ്പ് കൊലയ്ക്ക് പദ്ധതിയിട്ടിരുന്നുവെന്ന് ഇവർ പോലീസിനോട് പറഞ്ഞിട്ടുണ്ട്. പത്തിലേറെ കുത്തുകള്‍ മാലയുടെ ദേഹത്തുണ്ട്. തങ്ങളെ തടയാൻ ശ്രമിച്ചപ്പോഴാണ് വേലക്കാരനെയും കൊന്നതെന്ന് ഇവർ കുറ്റം സമ്മതിച്ചിട്ടുണ്ട്.
ഗ്രീൻ മാര്‍ക്ക് ഏരിയയിലായിരുന്നു മാലയുടെ വസ്ത്രസ്ഥാപനം. ബുധനാഴ്ച രാത്രിയോടെ ഇവർ വസന്ത് കുഞ്ചിലെ വീട്ടിലേക്ക് മടങ്ങിയെത്തിയതിനുശേഷമായിരുന്നു കൊലപാതകം. വ്യാഴാഴ്ച പുലര്‍ച്ചെയാണ് സംഭവം അയൽവാസികള്‍ അറിഞ്ഞത്. തുടര്‍ന്ന് ഉടൻ പോലീസിനെ വിവരമറിയിക്കുകയായിരുന്നു. വീട്ടിൽ മാലയുടെ മൃതദേഹം കിടപ്പുമുറിയിലും ബഹാദൂറിന്‍റെ മൃതദേഹം അടുക്കളയിലുമായിട്ടായിരുന്നു കിടന്നിരുന്നത്. രണ്ട് മൃതദേഹങ്ങളും പോസ്റ്റ് മോര്‍ട്ടത്തിന് ശേഷം സംസ്കാരം നടത്തി.