പദ്മാവതി റീലീസ് തടയണമെന്ന ഹര്‍ജി ഡല്‍ഹി ഹൈക്കോടതി തള്ളി

ന്യൂഡല്‍ഹി:സഞ്ജയ് ലീല ബന്‍സാലി സംവിധാനം ചെയ്ത ബോളിവുഡ് ചിത്രം പത്മാവതി റിലീസ് ചെയ്യുന്നതിന് എതിരെ സമര്‍പ്പിച്ച പൊതു താത്പര്യ ഹര്‍ജി ഡല്‍ഹി ഹൈക്കോടതി തള്ളി. അഖാണ്ഡ് രാഷ്ട്രവേദി പാര്‍ട്ടിയാണ് ഹര്‍ജി നല്‍കിയത്. ചിത്രത്തില്‍ ചരിത്രത്തെ വളച്ചൊടിച്ചിട്ടുണ്ടോയെന്ന് വിലയിരുത്താന്‍ പ്രത്യേക സമിതി രൂപവത്കരിക്കണമെന്നും ഹര്‍ജിയില്‍ ആവശ്യപ്പെട്ടിരുന്നു.

ഇതോടൊപ്പം സാമൂഹ്യ പ്രവര്‍ത്തകരും സര്‍വകലാശാലകളിലെ ചരിത്ര ഗവേഷകരും അടക്കമുള്ളവരെ സമിതിയില്‍ ഉള്‍പ്പെടുത്തണമെന്നും ആവശ്യം ഉന്നയിച്ചിരുന്നു. ഹര്‍ജി പരിഗണിക്കുന്നത് സിനിമയ്‌ക്കെതിരെ പ്രതിഷേധിക്കുന്നവര്‍ക്ക് അനാവശ്യ പ്രോത്സാഹനം നല്‍കുമെന്ന് വിലയിരുത്തിയാണ് ഹര്‍ജി തള്ളിയതെന്ന് ഹൈക്കോടതി വിലയിരുത്തി.

ഡിസംബര്‍ ഒന്നിന് നിശ്ചയിച്ചിരുന്ന പദ്മാവതിയുടെ റിലീസ് വിവാദങ്ങളെത്തുടര്‍ന്ന് നീട്ടിവച്ചിരിക്കുകയാണ്. റിലീസ് സ്റ്റേ ചെയ്യണമെന്ന് ആവശ്യപ്പെട്ട് സമര്‍പ്പിച്ച ഹര്‍ജി നേരത്തെ സുപ്രീം കോടതി തള്ളിയിരുന്നു.