ഡൽഹി കലാപം: സീതാറാം യെച്ചൂരിക്ക് എതിരെ ഗൂഢാലോചനകുറ്റം

ന്യൂഡൽഹി: ഡൽഹി കലാപക്കേസിൽ സിപിഎം ജനറൽ സെക്രട്ടറി സീതാറാം യെച്ചൂരി ഉൾപ്പെടെയുള്ള രാഷ്ട്രീയ നേതാക്കളെ അനുബന്ധ കുറ്റപത്രത്തിൽ ഉൾപ്പെടുത്തി ഡൽഹി പോലീസ്. രാഷ്ട്രീയ നേതാക്കൾക്ക് കലാപ ഗൂഢാലോചനയിൽ പങ്കുണ്ടെന്നാണ് കുറ്റപത്രത്തിലുള്ളത്.

സീതാറാം യെച്ചൂരിയ്ക്ക് പുറമെ സ്വരാജ് അഭിയാൻ നേതാവ് യോഗേന്ദ്ര യാദവ്, സാമ്പത്തിക വിദഗ്ദ ജയതി ഘോഷ്, ഡൽഹി യൂണിവേഴ്സിറ്റി പ്രൊഫസറും ആക്ടിവിസ്റ്റുമായ അപൂർവാനന്ദ്, ഡോക്യുമെന്‍ററി സംവിധായകൻ രാഹുൽ റോയ് എന്നിവരുടെ പേരുകളാണ് അനുബന്ധ കുറ്റപത്രത്തിൽ ഉൾപ്പെടുത്തിയിരിക്കുന്നത്.

Also Read: ഓക്സ്ഫഡ് കൊവിഡ് വാക്സിൻ പരീക്ഷണം പുനഃരാരംഭിച്ചു

കലാപത്തിൽ മൂന്ന് വിദ്യാർത്ഥികളുടെ കേസുമായി ബന്ധപ്പെട്ട് ഡൽഹി പോലീസ് സമർപ്പിച്ച അനുബന്ധ കുറ്റപത്രത്തിലാണ് രാഷ്ട്രീയ നേതാക്കളുടെ പേരുകളും ഉൾപ്പെടുത്തിയിരിക്കുന്നത്. ജെഎൻയു വിദ്യാർഥികളായ ദേവാഗംന കലിത, നതാഷ നർവാൾ, ജാമിയ വിദ്യാർഥി ഗുൽഫിഷ ഫാത്തിമ എന്നിവരുടെ കേസുകളുമായി ബന്ധപ്പെട്ടാണ് ഇത്. മൂന്നു പേർക്കുമെതിരെ നിരവധി വകുപ്പുകൾ പ്രകാരമുള്ള കേസുകളാണ് നിലവിൽ നടക്കുന്നത്.

ജെഎഎൻയുവിലെയും ജാമിയ മിലിയ യൂണിവേഴ്സിറ്റിയിലെയും വിദ്യാർഥികൾക്കെതിരെ ചുമത്തിയ കേസുകളുമായി ബന്ധപ്പെട്ടാണ് നേതാക്കൾക്കെതിരായ പരാമർശം. പാർലമെന്റിന്‍റെ മൺസൂൺ സെഷൻ ആരംഭിക്കുന്നതിന് രണ്ട് ദിവസം മുമ്പാണ് കുറ്റപത്രം പരസ്യപ്പെടുത്തിയിരിക്കുന്നത്.

Also Read: സംസ്ഥാനത്ത് ചികിത്സയിലുള്ളത് 28802 ആളുകൾ; ഇന്ന് ആശുപത്രിയില്‍ പ്രവേശിപ്പിച്ചത് 2576 പേരെ

പൗരത്വ നിയമ ഭേദഗതിയുമായി ബന്ധപ്പെട്ട സമരങ്ങൾക്ക് പിന്നാലെയായിരുന്നു ഡൽഹിയിൽ കലാപം പൊട്ടിപുറപ്പെട്ടത്. ഫെബ്രുവരി അവസാന വാരം നടന്ന കലാപത്തിൽ 53 പേർക്കാണ് ജീവൻ നഷ്ടപ്പെട്ടത്. 581 പേർക്ക് പരിക്കേൽക്കുകയും ചെയ്തിരുന്നു. കലാപത്തെക്കുറിച്ച് അന്വേഷിക്കാൻ രണ്ട് പ്രത്യേക അന്വേഷണ സംഘത്തെയായിരുന്നു സർക്കാർ നിയോഗിച്ചത്. കലാപം അവസാനിച്ച് ദിവസങ്ങൾക്കകം രണ്ടായിരത്തിലേറെ പേരെ കസ്റ്റഡിയിലെടുക്കുകയും ചെയ്തിരുന്നു.