'ബോയ്സ് ലോക്കര്‍ റൂം' പൂട്ടിച്ച് ദിവസങ്ങള്‍ക്കുള്ളില്‍ ഡല്‍ഹി വനിതാ കമ്മീഷന്‍ അധ്യക്ഷയ്ക്ക് നേരെ വധഭീഷണി

ന്യൂഡല്‍ഹി։ ഡല്‍ഹി വനിതാ കമ്മീഷന്‍ അധ്യക്ഷ സ്വാതി മലിവാളിന് നേരെ വധഭീഷണിയുണ്ടായതായി പൊലീസില്‍ പരാതി. ട്വിറ്ററിലൂടെയാണ് ഇത്തരത്തില്‍ വധഭീഷണിയുണ്ടായത്.

ഏറെ വിവാദമായ ബോയ്സ് ലോക്കര്‍ റൂം എന്ന ഇന്‍സ്റ്റഗ്രാം ഗ്രൂപ്പിന്റെ അഡ്മിനെ സൈബര്‍ സെൽ അറസ്റ്റ് ചെയ്ത് ദിവസങ്ങള്‍ക്കുള്ളിലാണ് ഇത്തരത്തില്‍ ഭീഷണി ഉയര്‍ന്നിരിക്കുന്നത്. 12 ക്ലാസ് വിദ്യാര്‍ത്ഥിയേയാണ് ഇത്തരത്തില്‍ പൊലീസ് അറസ്റ്റ് ചെയ്തത്.

Also Read : COVID-19 Live Page: കൊവിഡ് ബാധിച്ച് ആലപ്പുഴ സ്വദേശി യുഎസില്‍ മരിച്ചു

പെണ്‍കുട്ടികളുടെ അശ്ലീല ചിത്രങ്ങള്‍ പങ്കുവയ്ക്കുകയും അവരെ അധിക്ഷേപിക്കുകയും ചെയ്യുന്ന ചാറ്റുകളായിരുന്നു ഈ ഗ്രൂപ്പിലുണ്ടായിരുന്നത്. പെണ്‍കുട്ടികളെ ബലാത്സംഗം ചെയ്യുന്നത് അടക്കം ഇവിടെ സജ്ജീവ ചര്‍ച്ചാ വിഷയം ആകാറുണ്ട്. ഇതിന്റെ സ്ക്രീന്‍ ഷോട്ടുകള്‍ സമൂഹ മാധ്യമങ്ങളില്‍ പ്രചരിച്ചിരുന്നു. ഇതോടെയാണ് ഗ്രൂപ്പിലെ ചര്‍ച്ചകള്‍ പുറം ലോകത്ത് വന്നത്. പ്രതികളെ പിടികൂടുന്നതിലടക്കം സ്വാതി സജ്ജീവ സാന്നിധ്യമായിരുന്നു.

ട്വിറ്ററിലൂടെ വന്ന വധഭീഷണിയില്‍ ഡല്‍ഹി പൊലീസ് സൈബര്‍സെല്‍ വിഭാഗത്തെയാണ് സമീപിച്ചിരിക്കുന്നത്. കൊല്ലുമെന്നും അപകടത്തില്‍ പെടുത്തുമെന്നും ട്വിറ്റര്‍ ഹാന്‍ഡിലില്‍ വന്ന സന്ദേശത്തില്‍ പറയുന്നു. ഇത്തരത്തില്‍ ഭീഷണി സന്ദേശം അയച്ച ആളെ എത്രയും വേഗം അറസ്റ്റ് ചെയ്യണമെന്നും സ്വാതി ആവശ്യപ്പെട്ടു.

Also Read : വൈറസ് ബാധിതർ 40 ലക്ഷത്തിന് അരികെ։ അമേരിക്കൻ വൈസ് പ്രസിഡന്റിന്റെ സഹായിക്കും കൊവിഡ്

പൗരത്വ നിയമ ഭേദഗതി നിയമത്തിനെതിരെ സമരം ചെയ്ത ജാമിയ മില്ലിയ ഇസ്ലാമിയ വിദ്യാര്‍ത്ഥി സഫൂറ സര്‍ഗാറിനെ അറസ്റ്റ് ചെയ്തതിനെതിരെ ഇവര്‍ കടുത്ത ഭാഷയില്‍ വിമര്‍ശനങ്ങള്‍ ഉന്നയിച്ചിരുന്നു. ഗർഭിണിയായ സഫൂറയെ അറസ്റ്റ് ചെയ്തതും സമൂഹ മാധ്യമങ്ങളിലൂടെയുണ്ടായ അധിക്ഷേപങ്ങളും ഇവര്‍ ചോദ്യം ചെയ്തതിരുന്നു.