രാജസ്ഥാൻ സർക്കാരിനെ പ്രതിസന്ധിയിലാക്കിയ കോൺഗ്രസിലെ വിമത നീക്കങ്ങൾക്ക് പിന്നാലെ മഹാരാഷ്ട്ര സർക്കാരിനെ അട്ടിമറിക്കാൻ ബിജെപി ശ്രമിക്കുന്നെന്ന വാർത്തകൾ പുറത്ത് വന്നിരുന്നു. ചില ബിജെപി നേതാക്കൾ ഒക്ടോബറിൽ സർപ്രൈസ് പ്രതീക്ഷിക്കാമെന്ന് പറഞ്ഞതായിരുന്നു നേരത്തെ അഭ്യൂഹങ്ങൾക്ക് വഴിതെളിയിച്ചതെങ്കിൽ സംസ്ഥാനത്തെ മുതിർന്ന ബിജെപി നേതാവും മുൻ മുഖ്യമന്ത്രിയുമായ ദേവേന്ദ്ര ഫഡ്നാവിസിന്‍റെ വാക്കുകളും അഭ്യൂഹങ്ങൾക്ക് വഴിതെളിയിച്ചിരിക്കുകയാണ്. അമിത് ഷായുമായുള്ള കൂടിക്കാഴ്ചയ്ക്ക് പിന്നാലെയാണ് ഫഡ്നാവിസ് പ്രസ്താവന നടത്തിയതെന്നതും ശ്രദ്ധേയമാണ്.
മഹാരാഷ്ട്രയിൽ ഓപ്പറേഷൻ താമര വേണ്ടിവരില്ല
മഹാരാഷട്രയില്‍ ഓപ്പറേഷന്‍ താമര വേണ്ടിവരില്ലെന്നും ആഭ്യന്തര കലഹങ്ങളെ തുടര്‍ന്ന് മഹാവികാസ് അഖാഡി സര്‍ക്കാര്‍ സ്വയം താഴെ വീഴുമെന്നുമാണ് മുതിര്‍ന്ന ബിജെപി നേതാവ് ദേവേന്ദ്ര ഫഡ്നാവിസ് പറഞ്ഞത്. കേന്ദ്ര ആഭ്യന്തര മന്ത്രിയും മുൻ ബിജെപി ദേശീയ അധ്യക്ഷനുമായ അമിത് ഷായുമായി നടത്തിയ ചര്‍ച്ചക്ക് ശേഷമാണ് ഫഡ്നാവിസ് ഇക്കാര്യം പറഞ്ഞത്. അമിത് ഷായുമായുള്ള കൂടികാഴ്ച രാഷ്ട്രീയേതരമാണെന്നാണ് ഫഡ്നാവിസ് പറയുന്നതെങ്കിലും നിലവിലെ രാഷ്ട്രീയ സ്ഥിതിഗതികളുടെ അടിസ്ഥാനത്തിൽ ഇതിന് പലമാനങ്ങളുമുണ്ടെന്നാണ് രാഷ്ട്രീയ നിരീക്ഷകർ പറയുന്നത്.
ജാഗ്രതയിൽ മഹാവികാസ് അഖാഡി സർക്കാർ
നിയമസഭ തെരഞ്ഞെടുപ്പിന് പിന്നാലെ ബിജെപിയുമായി അകന്ന് അന്നത്തെ പ്രതിപക്ഷവുമായി കൈ കോർത്ത ശിവസേനയുടെ നേതൃത്വത്തിലുള്ള മുന്നണിയാണ് സംസ്ഥാനം ഭരിക്കുന്നത്. ശിവസേന- എൻസിപി- കോൺഗ്രസ് സർക്കാരുകളുടെ നേതൃത്വത്തിലുള്ള മഹാവികാസ് അഖാഡി സർക്കാർ ഏറെ നാൾ നീണ്ട് നിന്ന രാഷ്ട്രീയ അനിശ്ചിതത്വങ്ങൾക്കൊടുവിലായിരുന്നു സർക്കാർ രൂപീകരിച്ചത്. പല സംസ്ഥാനങ്ങളിലും പ്രതിപക്ഷ എംഎൽഎമാരെ സ്വാധീനിച്ച് ഭരണത്തിലേറിയ ബിജെപിയ്ക്കേറ്റ കനത്ത തിരിച്ചടിയായിരുന്നു മഹാരാഷ്ട്രയിലേത്. ഇവിടെ ബിജെപിയിൽ നിന്ന് ഏത് സമയത്തും അട്ടിമറി നീക്കമുണ്ടായേക്കാമെന്നാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്.
അമിത് ഷായുമായി നടത്തിയത് രാഷ്ട്രീയ കൂടിക്കാഴ്ച അല്ലെന്ന് ഫഡ്നാവിസ്
അമിത് ഷായുമായുള്ള കൂടികാഴ്ച രാഷ്ട്രീയേതരമാണെന്നും സംസ്ഥനാത്തെ പഞ്ചാസാര വ്യവസായത്തെ വിപൂലീകരിക്കുന്നതിനെ കുറിച്ചാണ് ചര്‍ച്ച ചെയ്തതെന്നുമാണ് ഫഡ്നാവിസ് പറയുന്നത്. എന്നാൽ ബിജെപിയുടെ ചാണക്യനെന്ന് അറിയപ്പെടുന്ന അമിത് ഷായും മഹാരാഷ്ട്രയിലെ ഉന്നത ബിജെപി നേതാവുമായുള്ള ചർച്ച സംസ്ഥാന രാഷ്ട്രീയത്തെക്കുറിച്ചാകുമെന്നാണ് വിലയിരുത്തപ്പെടുന്നത്. നേരത്ത തന്നെ മധ്യപ്രദേശിനും രാജസ്ഥാനും പിന്നാലെ മഹാരാഷ്ട്രയാകും അടുത്ത ശ്രദ്ധാ കേന്ദ്രമാകുകയെന്ന് റിപ്പോർട്ടുകളുണ്ടായിരുന്നു.
സർക്കാരിനെ അട്ടിമറിക്കാൻ താൽപ്പര്യമില്ല
സംസ്ഥാനത്തെ കൊറോണ വൈറസ് സാഹചര്യത്തെ കുറിച്ച് താന്‍ അമിത് ഷായെ അറിയിച്ചെന്ന് പറയുന്ന ഫഡ്നാവിസ് സംസ്ഥാന സര്‍ക്കാറിനെ അട്ടിമറിക്കാന്‍ തങ്ങള്‍ക്ക് താൽപ്പര്യമില്ലെന്നും ഈ സമയം കൊറോണ വൈറസിനെ നേരിടുകയാണ് വേണ്ടെതെന്നും കൂട്ടിച്ചേര്‍ത്തു. സംസ്ഥാനത്ത് ഓപ്പറേഷൻ ലോട്ടസ് നടപ്പില്ലാക്കാതെ തന്ന ആഭ്യന്തര കലഹങ്ങൾ മൂലം സർക്കാർ വീഴുമെന്നും അദ്ദേഹം പറയുന്നു.
ഒക്ടോബറിൽ സർപ്രൈസെന്ന് ബിജെപി
മഹാരാഷ്ട്രയിൽ ഒക്ടോബറിൽ സർപ്രൈസ് പ്രതീക്ഷിക്കാമെന്ന് ചില ബിജെപി നേതാക്കൾ പറഞ്ഞതും അഭ്യൂഹങ്ങൾ ശക്തമാക്കിയിട്ടുണ്ട്. നേരത്തെ നിയമസഭ തെരഞ്ഞെടുപ്പിന് പിന്നാലെ എൻസിപി നേതാവ് അജിത് പവാറിനെ ഉപമുഖ്യമന്ത്രിയാക്കി ബിജെപി നേതാവ് ദേവേന്ദ്ര ഫഡ്നാവിസ് സത്യപ്രതിജ്ഞ ചെയ്ത് അധികാരമേറ്റിരുന്നു. എന്നാൽ അജിത് പവാറിനൊപ്പമുണ്ടായിരുന്ന നേതാക്കൾ ശരദ് പവാറിനൊപ്പം തിരികെപോയതിന് പിന്നാലെ ഭൂരിപക്ഷം തെളിയിക്കാനാകില്ലെന്ന് മനസിലാക്കിയ ഫഡ്നാവിസ് രാജിവെച്ച് ഒഴിയുകയായിരുന്നു.