രാഹുലിന്‍റെ വിമാന യാത്ര: തകരാർ അസാധാരണമല്ലെന്ന് ഡിജിസിഎ

ന്യൂഡൽഹി: കോൺഗ്രസ് അധ്യക്ഷൻ രാഹുൽ ഗാന്ധി സഞ്ചരിച്ച വിമാനത്തിന് സാങ്കേതിക തകരാർ ഉണ്ടായത് വൻ അട്ടിമറിയുടെ ഭാഗമാണെന്ന് കോൺഗ്രസ്. രാഹുലിന്റെ കർണാടക യാത്രക്കിടെയാണ് വിമാനത്തിന് സാങ്കേതിക തകരാർ സംഭവിച്ചത്. മനഃപൂർവമുള്ള അട്ടിമറി സാധ്യതയാകാമെന്നും അതിനുള്ള സാധ്യത തള്ളിക്കളയാനാകില്ലെന്നും കോൺഗ്രസ് ആരോപിച്ചു.

രണ്ട് പൈലറ്റുമാരെ അന്വേഷണത്തിന്റെ ഭാഗമായി പോലീസ് കസ്റ്റഡിയിലെടുത്ത് ചോദ്യം ചെയ്തു. എന്നാൽ വിമാനത്തിനുണ്ടായ സാങ്കേതിക തകരാർ അസാധാരണമല്ലെന്ന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ(ഡിജിസിഎ) പറഞ്ഞു. ഓട്ടോ പൈലറ്റ് സംവധാനത്തിലുണ്ടാകുന്ന ഇത്തരം പാളിച്ചകൾ സാധാരണയാണ്. അസ്വാഭാവികത ഉണ്ടായെന്ന് തോന്നുന്ന വിഐപി വിമാനങ്ങൾ ഡിജിസിഎ പരിശോധിക്കുന്നത് പതിവ് നടപടിയാണ്.

വിമാനം പരിശോധിച്ച ശേഷം രണ്ടാഴ്‌ചക്കുള്ളിൽ റിപ്പോർട്ട് സമർപ്പിക്കുമെന്ന് ഡിജിസിഎ വ്യക്തമാക്കി. രാഹുൽ ഗാന്ധി കർണാടകയിലേക്ക് പോയ വിമാനം പലതവണ കറങ്ങുകയും ഇടത്തേക്ക് ഉലയുകയും ചെയ്തു. പിന്നീട് താഴേക്ക് ചാരിയുകയും ചെയ്തുവെന്ന് ഡിജിസിഎക്ക് കോൺഗ്രസ് നൽകിയ പരാതിയിൽ വ്യക്തമാക്കുന്നു. വിമാനം ഹൂബ്ലി വിമാനത്താവളത്തിൽ ഇറങ്ങുന്നതിനിടെ റൺവേയിൽ നിന്ന് തെന്നിപ്പോയതായും റിപ്പോർട്ടുണ്ട്.