മഹാരാഷ്ട്രയിൽ 283 പുതിയ കൊവിഡ് കേസുകൾ; ധാരാവിയിൽ മാത്രം 30 പേർക്ക് രോഗബാധ

മുംബൈ: രാജ്യത്ത് ഏറ്റവും കൂടുതൽ കൊവിഡ്-19 കേസുകൾ റിപ്പോർട്ട് ചെയ്ത മഹാരാഷ്ട്രയിൽ ഇന്ന് 283 പേർക്ക് കൂടി രോഗം സ്ഥിരീകരിച്ചു. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 4,483 ആയി ഉയർന്നു. ധാരാവിയിൽ ഇന്ന് 30 പേർക്കാണ് രോഗം സ്ഥിരീകരിച്ചതെന്നതും ആശങ്കയുണർത്തുന്ന കാര്യമാണ്. ഏഷ്യയിലെ ഏറ്റവും വലിയ ചേരിയാണ് കൊവിഡ് ഹോട്സ്പോട്ടായി മാറിയിരിക്കുന്നത്.

ഇന്ന് 30 പേർക്ക് കൂടി കൊവിഡ് സ്ഥിരീകരിച്ചതോടെ ധാരാവിയിലെ ആകെ രോഗബാധിതരുടെ എണ്ണം 168 ആയി ഉയർന്നു. ഇവിടെ മാത്രം 11 മരണങ്ങളാണ് റിപ്പോർട്ട് ചെയ്യപ്പെട്ടത്. ഇന്നലെ ധാരാവിയിൽ 20 കേസുകളായിരുന്നു റിപ്പോർട്ട് ചെയ്തത്. ഇന്ന് റിപ്പോർട്ട് ചെയ്ത 30 കേസുകളിൽ 17 പേർ 35 വയസിന് താഴെയുള്ളവരാണെന്നതും ശ്രദ്ധേയമാണ്. രണ്ട് വയസുള്ള കുട്ടിയും 15 വയസുള്ള മറ്റൊരു കുട്ടിയും പട്ടികയിലുൾപ്പെടുന്നുണ്ട്.

Also Read: Live: ദുബായിൽ രണ്ട് മലയാളികൾ കൂടി കൊവിഡ് ബാധിച്ച് മരിച്ചു

സംസ്ഥാനത്ത് ഇന്ന് റിപ്പോർട്ട് ചെയ്യപ്പെട്ട 283 കേസുകളിൽ 187 എണ്ണവും മുംബൈയിലാണ്. ധാരാവിയലെ 30 പേരുൾപ്പെടെയാണിത്. രാജ്യത്ത് തന്നെ കൂടുതൽ കൊവിഡ് കേസുകൾ റിപ്പോർട്ട് ചെയ്ത നഗരങ്ങളിലൊന്നാണ് വ്യാവസായിക തലസ്ഥാനം.

രാജ്യത്ത് കഴിഞ്ഞ 24 മണിക്കൂറിനിടെ 1553 കൊവിഡ് കേസുകളും 36 മരണങ്ങളും റിപ്പോർട്ട് ചെയ്തെന്ന് വൈകീട്ട് ആരോഗ്യ മന്ത്രാലയം വാർത്താ സമ്മേളനത്തിൽ വ്യക്തമായിരുന്നു. ഇതോടെ രാജ്യത്തെ ആകെ കൊവിഡ് ബാധിതരുടെ എണ്ണം 17,265 ആയി ഉയർന്നു. 543 പേർക്കാണ് വൈറസ് ബാധമൂലം ജീവൻ നഷ്ടപ്പെട്ടത്. ഇതുവരെ 2,547 പേരുടെ രോഗം ഭേദമായിട്ടുമുണ്ട്.