ഒടുവിൽ ഡീസൽ വില പെട്രോൾ വിലയെയും മറികടന്നു!

ഭുവനേശ്വർ: ഒടുവിൽ പെട്രോൾ വിലയെ മറികടന്ന് ഡീസൽവില കുതിച്ചു. ഒഡീഷയിലാണ് ഡീസൽവില പെട്രോൾ വിലയെ മറികടക്കുന്നത്. രാജ്യത്ത് ആദ്യമായാണ് ഒരു സംസ്ഥാനത്ത് ഇങ്ങനെ സംഭവിക്കുന്നത്.

ഒഡീഷയിൽ ഇന്നലെ പെട്രോളിന് ലിറ്ററിന് 80.65 പൈസയും ഡീസലിന് 80.78 പൈസയുമായിരുന്നു വില. 13 പൈസയാണ് കൂടുതൽ വന്നത്. വിലവർധനവ് കാരണം ഡീസൽ വിൽപനയിൽ കുറവുണ്ടായെന്നാണ് റിപ്പോർട്ടുകൾ.

ഒഡീഷയിൽ പെട്രോളിനും ഡീസലിനും തുല്യനികുതിയാണ് ഈടാക്കുന്നത്. 26 ശതമാനമാണ് സംസ്ഥാനത്ത് ഈടാക്കുന്ന വാറ്റ്. ഇത് കാരണമാണ് ഡീസൽവില പെട്രോൾവിലയെ മറികടന്നത്.

കേന്ദ്രത്തിന് എണ്ണവിലയിൽ യാതൊരു വിധ നിയന്ത്രണവുമില്ലെന്ന് ഒഡീഷ ധനമന്ത്രി എസ്.ബി ബെഹ്‌റ കുറ്റപ്പെടുത്തി. എന്നാൽ സംസ്ഥാന സർക്കാരിൻെറ പിടിപ്പുകേടാണ് വിലവർധനവിന് കാരണമെന്ന് സംസ്ഥാന ബി.ജെ.പി ജനറല്‍ സെക്രട്ടറി പൃഥ്വിരാജ് ഹരിചന്ദ് പറഞ്ഞു.