വിദേശികള്‍ ഇന്ത്യയില്‍ പാവാട ധരിക്കരുതെന്ന് മന്ത്രി

ആഗ്ര: ഇന്ത്യ സന്ദര്‍ശത്തിനെത്തുന്ന വിദേശികൾ ചെറിയ പാവാട ധരിക്കരുതെന്ന് കേന്ദ്ര ടൂറിസം മന്ത്രി മഹേഷ് ശർമ്മ പറഞ്ഞു. വിദേശത്ത് നിന്ന് എത്തുന്ന സ്ത്രീകളുടെ സുരക്ഷക്ക് വേണ്ടിയാണ് താൻ ഇത് പറയുന്നതെന്നും മന്ത്രി കൂട്ടിച്ചേർത്തു. ഇന്ത്യയുടെ തനത് സംസ്കാരം പാശ്ചാത്യ രാജ്യങ്ങളുടേതിൽ നിന്ന് ഏറെ വ്യത്യസ്തമാണ്.

ഇന്ത്യയിലെ ക്ഷേത്ര നഗരങ്ങളായ മതുര ,വൃന്ദാവൻ തുടങ്ങിയവ സന്ദർശിക്കുമ്പോൾ ഇവിടുത്തെ സംസ്കാരം ഉൾക്കൊണ്ട് അതനുസരിച്ച് പ്രവർത്തിക്കാൻ വിദേശികൾ തയ്യാറാവണമെന്നും മഹേഷ് ശർമ്മ മാധ്യമപ്രവർത്തകരോട് പറഞ്ഞു. ചെറിയ പാവാട ധരിച്ചു കൊണ്ട് വിദേശികൾ രാത്രികാലങ്ങളിൽ ഇന്ത്യയിലെ റോഡുകളിൽ സഞ്ചരിക്കുന്നതും ഒഴിവാക്കണം.

ഈ വിശദശാംശങ്ങൾ ഉൾക്കൊള്ളിച്ചു കൊണ്ടുള്ള ലഘുലേഖകൾ വിമാനത്താവളത്തിൽ എത്തുമ്പോൾ തന്നെ അവരുടെ കൈകളിൽ എത്തിക്കാനുള്ള നടപടി സ്വീകരിക്കും. അവർ എന്ത് ധരിക്കണം എന്ത് ധരിക്കരുത് എന്ന് താൻ പറയുന്നില്ല പകരം മുൻകരുതൽ എടുക്കണം എന്ന് മാത്രമേ അഭിപ്രായപ്പെടുന്നുള്ളൂവെന്നും മന്ത്രി കൂട്ടിച്ചേർത്തു.