ബിആർ അംബേദ്കറുടെ മുംബൈയിലെ വീടിന് നേരെ ആക്രമണം

മുംബൈ: ഭരണഘടനാ ശിൽപി ഡോ. ബിആർ അംബേദ്കറുടെ മുംബൈയിലെ വീടിനു നേരെ അജ്ഞാത സംഘത്തിന്‍റെ ആക്രമണം. മുംബൈ ദാദറിലുള്ള രാജഗൃഹം എന്ന സ്മാരക വസതിക്ക് നേരെയാണ് ആക്രമണമുണ്ടായത്. ചൊവ്വാഴ്ച വൈകീട്ടാണ് സംഭവം നടന്നതെന്ന് പോലീസ് അറിയിച്ചു.

വീടിനു മുന്നിലെ ചെടിച്ചട്ടികളും മറ്റും തകർത്ത നിലയിലാണുള്ളത്. സിസിടിവി ക്യാമറയും സംഘം നശിപ്പിച്ചെന്ന് വാർത്താ ഏജൻസിയായ എഎൻഐ ട്വീറ്റ് ചെയ്തു. സംഭവത്തെ അപലപിച്ച മഹാരാഷ്ട്ര ആഭ്യന്തര മന്ത്രി അനിൽ ദേശ്മുഖ് കുറ്റക്കാർക്കെതിരേ ശക്തമായ നടപടി സ്വീകരിക്കുമെന്ന് വ്യക്തമാക്കി.


Also Read: തൂത്തുക്കുടി കസ്‌റ്റഡി കൊലപാതകം സിബിഐക്ക്

പോലീസ് സംഭവം അന്വേഷിച്ച് വരികയാണെന്നും കുറ്റക്കാർക്കെതിരെ കർശന നടപടി സ്വീകരിക്കുമെന്നുമാണ് ദേശ്മുഖ് ട്വീറ്ററിലൂടെ പ്രതികരിച്ചത്. മന്ത്രിമാരായ ജയന്ത് പാട്ടീൽ, ധനഞ്ജയ മുണ്ടെ എന്നിവരും സംഭവത്തെ അപലപിച്ച് രംഗത്തെത്തിയിട്ടുണ്ട്.

ആക്രമണത്തിന്റെ പേരിൽ ആരും പ്രകോപനത്തിന് മുതിരരുതെന്ന് അംബേദ്കറുടെ ചെറുമകനും വഞ്ചിത് ബഹുജൻ അഘാടി പ്രസിഡന്‍റുമായ പ്രകാശ് അംബേദ്കർ പറഞ്ഞു. രാജഗൃഹത്തിനു മുന്നിൽ ആളുകൾ കൂടി നിൽക്കരുതെന്നും അദ്ദേഹം ആഹ്വാനം ചെയ്തിരുന്നു. സമാധാനാഹ്വാനവുമായി അംബേദ്കറുടെ ചെറുമകൻ ബിംറാവും അബേദ്കറും രംഗത്തെത്തിയിട്ടുണ്ട്.