ക്യാൻസർ മരുന്നുകൾക്ക് 55 ശതമാനം വില കുറച്ചു

ന്യൂഡൽഹി: നാഷണൽ ഫാർമസ്യൂട്ടിക്കൽ പ്രൈസിംഗ് അതോറിറ്റി(NPPA) 54 അവശ്യമരുന്നുകളുടെ വില വെട്ടിക്കുറച്ചു. ക്യാൻസർ മരുന്നുകൾക്ക് 54-55 ശതമാനം വരെ വില കുറച്ചു. രക്തസമ്മർദ്ദം, പ്രമേഹം, ഹൃദ്രോഗം എന്നിവയുടെ മരുന്നുകളുടെയും ആന്‍റിബയോട്ടിക്കുകളുടെയും വില കുറച്ചിട്ടുണ്ട്. വില ഏകീകരണത്തിന്‍റെ ഭാഗമായാണ് സാധാരണ ഉപയോഗിക്കാറുള്ള മരുന്നുകളുടെ വില കുറച്ചതെന്ന് NPPA ചെയർമാൻ ഭൂപീന്ദർ സിംഗ് പറയുന്നു. ചൊവ്വാഴ്ച പുറത്തിറക്കിയ ഉത്തരവ് പ്രകാരം നിർമാതാക്കൾ, വിതരണക്കാർ, റീട്ടൈൽ വിൽപ്പനക്കാർ എന്നിവരെല്ലാം പുതിയ വിലയനുസരിച്ചേ മരുന്നുകൾ വിൽക്കാവൂ.

വില നിയന്ത്രിക്കാനുള്ള 684-875 മരുന്നുകളുടെ പട്ടിക കഴിഞ്ഞ ഡിസംബറിൽ കേന്ദ്രസർക്കാർ കൊണ്ടുവന്നിരുന്നു. ഏപ്രിൽ 28ന് 54 മരുന്നുകളുടെ പുതുക്കിയ വിലപ്പട്ടിക പുറത്ത് വിട്ടിരുന്നു. 15 ദിവസത്തിനിടെ ഇത് രണ്ടാം വട്ടമാണ് മരുന്നുവില കുറയ്ക്കുന്നത്.